Horvatııada Ánuranymyz shyrqala ma?

1993 jyly Toronto men 1994 jyly Ystanbuldan qorjynymyz bos qaıtty. 1995 jyly Atlantada El­mádı Jabraıylov (82 kg) kú­mis me­daldy enshiledi. Fınal­da onyń Barselona Olım­pıa­da­synyń jeńimpazy, álem chempıony, amerıkalyq Kevın Djek­sonǵa áli jetpedi. 1997 jyly Krasnoıarskide Máýlen Mamyrov (54 kg) qola júldeni qanjyǵasyna baılady. Sodan keıin tórt birdeı baıraqty básekeden eńsemiz túsip oral­dyq. 1998 jyl men 2002 jyldary Tegeranda, 1999 jyly Ankara­da, 2001 jyly Sofııada sátsizdikke ushyradyq. 2003 jyly Nıý-Iorkte Gennadıı Lalıev (74 kg) úshinshi tuǵyr­ǵa taban tiredi. 2005 jyly Ma­gomed Krýglıev (84 kg) dál sol nátıjeni qaıtalady. 2006 jyly Gýanjoý men 2007 jyly Bakýde tym súreńsiz kúrestik. Al 2009 jyly Hernıngte Leonıd Spırıdonov (66 kg) qola júldeger atandy. 2010 jyly Máskeýde Ábilhakim Shápıev (74 kg) úshinshi oryndy ıelen­di. Joǵaryda esimderi atalǵan alty balýannyń ekeýi ǵana óz túlekterimiz. Olar – Mamyrov pen Krýglıev. Qalǵandary legıonerler. Atap aıtsaq, Jab­raıylovtyń ulty – sheshen, La­lıev – osetın, Spırıdonov – ıakýt, Shápıev – avar.

2011 jyly qazaqtyń qos qyrany – Dáýlet Nııazbekov (55 kg) pen Dáýren Jumaǵazıev (60 kg) Máýlen Mamyrovtyń erligin qaıtalap, álemdik dodada qola medaldy moıyndarynda jarqyratty. 2013 jyly Býdapeshtte, 2014 jyly Tashkentte, 2015 jyly Las-Vegasta jer sıpap qaldyq. 2016 jyly Majar­stannyń bas shaharynda Olım­pıa­dalyq emes salmaq dáre­je­leri boıynsha álem chempıo­naty uıymdastyrylyp, sol jarysta Nurlan Bekjanov (70 kg) kúmispen kúpteldi. Fınal­da ol reseılik Mago­med Qurbanálıevten utyl­dy. 2017 jyly Parıjde Aq­júrek Tańatarov (70 kg) qola medalmen jankúıerlerin qýantty. 2018 jyly Býdapeshte Nurıslam Sanaev (57 kg) aqtyq synǵa deıin alqynbaı jetti. Fınalda Reseı ókili Zaýr Ýgýevqa jol bergen tyvalyq legıoner kúmis medaldy qanaǵat tutty.

2019 jyly Astanada uıym­das­tyrylǵan álem chempıona­tynda elimizdiń erkin kúres ókil­deri óte jaqsy nátı­je kórsetti. Bul jarys­ta tórt balýanymyz jeńis tu­ǵy­ryna kóterildi. Fınalda daǵystandyq Gadjımurad Rashıdovtan utylǵan Dáýlet Nııazbekov (65 kg) pen osetın Davıd Baevtan jeńilgen Nurqoja Qaıpanov (70 kg) kúmis alsa, jartylaı fınalda súringen Nurıslam Sanaev (57 kg) pen Danııar Qaısanov (74 kg) qolaǵa qol sozdy. Buryn-sońdy otandyq erkin kúres sheberleri atalǵan jarysta dál osyndaı tabysqa qol jetkizgen joq edi.

2021 jyly Oslodaǵy jarys ta biz úshin oıdaǵydaı ótpedi. 2022 jyly júlde alý­ǵa tek Azamat Dáýletbekov­tiń (86 kg) kúsh-jigeri jetti. Oǵan buıyrǵany – qola. 2023 jyly otandyq erkin kú­res tarı­hynda teńdessiz oqı­ǵa tirkeldi. Belgradtyń boz­kileminde 19 jastaǵy Rıza­bek Aıtmuhan (92 kg) álem chempıony atandy. Nebir myqty balýandardan basym túsken qandasymyz bas júlde úshin básekede ázerbaıjandyq Osman Nurmagomedovtiń osal tusyn tapty. Rızabekke deıin elimiz­diń birde-bir ba­lýany bul be­les­ti baǵyn­dy­ra alma­ǵan edi. ­Sol jarys­ta Azamat Dáýletbe­kov (86 kg)­ ekinshi ret úshinshi satyǵa tu­raqtady. 2024 jyly Tıra­na­da Nurqoja Qaıpa­nov (70 kg)­ top jardy. Fınalda ol Iosınosýke Aoıagıdi jyqty. Sóıtip, Nurqojanyń esimi elimizden shyqqan ekinshi álem chempıony retinde sporttyq shejirege altyn áriptermen jazyldy.

Erkin kúresten Qazaqstan quramasy óz tarıhynda 2 altyn, 5 kúmis jáne 12 qolaǵa qol jetkizdi. Barlyǵy – 19 júlde. Statıstıkalyq málimetter­ge júginsek, kúrestiń bul túri­nen el quramasy óz tarıhynda nebári eki ret qana al­tyn tuǵyrǵa kóterilgenin ań­ǵa­rýǵa bolady. Bir qýantar­lyǵy, onyń ekeýin de olar 2023 pen 2024 jyldary jalaýy jelbiregen keıingi eki jarysta oljalady. Osyny negizge ala otyryp, 13-21 qyrkúıek ara­lyǵynda Horvatııanyń astanasy – Zagrebte ótetin baıraq­ty básekeden otandyq balýandarymyz bas júldesiz oralmaıdy dep úmittenemiz.