Bambýk ósirgen qarııa

Kóktem Ońtústikke erte keledi. «Aq kıimdi, deneli, aq saqaldy, soqyr, mylqaý tanymas tiri jandy», dep uly aqyn aıtatyn qys munda joq. Bolsa da qoıannyń quıryǵyndaı sholaq. Sodan ba, tropıkalyq ósimdik­ter de Ońtústiktiń topyraǵyn jersine bastady. Lımon, anar, banan ósirý túk bolmaı qaldy. Saryaǵash pen Saıram aýdan­darynda eki sharýa osy jemisterdi ósirip, máýesin jep júr. Al Kentaý qalasynyń Hantaǵy aýylynyń turǵyny Rahıp Zaınýtdınov jeti jyldan beri bambýk ósiredi. Shymkentke bir barǵanda bazardan tuqymyn kórip, áýestikpen satyp alǵan eken. Solqyldaǵan bambýk kúzge deıin jeti-segiz metr­den asyp ósip ketedi. Ra­hıp qarııa ony baqshadaǵy kók­ónisteriniń sabaǵy jerge qulamas úshin qada retinde paıdalanatyn bolypty. Sodan keıin úı tóbesin jabýǵa paıdalanǵan. Qorshaý jasap, shar­baq toqýǵa da taptyrmaıdy eken. Kerek tastyń aýyrlyǵy joq degen. Soltústiktiń adamdary kıno­dan, kitaptan ǵana kóre­tin bambýgińiz osylaısha Shym­kent­tegi sharýanyń kádesine jarap tur. Baqtııar TAIJAN, «Egemen Qazaqstan». Ońtústik Qazaqstan oblysy.