Foto: Aqorda
Osy maqsatta elimizde mańyzdy reformalar júzege asyrylyp, eń aldymen Konstıtýsııalyq sot quryldy.
«Elimizdegi zań ústemdigin qamtamasyz etetin asa mańyzdy ınstıtýt – Konstıtýsııalyq sot quryldy. Endi azamattar qandaı da bir zań óz quqyǵy men bostandyǵyna nuqsan keltiredi dep sanasa, Konstıtýsııalyq sotqa júgine alady. Eki jarym jyl ishinde bul organnyń qaraýyna 11 myńnan astam ótinish kelip tústi», dedi Prezıdent.
Onyń aıtýynsha, Konstıtýsııaǵa qaıshy keletin kóptegen normalar quqyqtyq júıeden alynyp tastaldy. Budan bylaı Konstıtýsııalyq sottyń sheshimderi ádil zańnamalyq tájirıbeniń negizine aınalady.
Sonymen qatar Ákimshilik rásimdik-prosestik kodekstiń engizilýi azamattar men memlekettiń jarııa-quqyqtyq qatynastaryn retteýde túbegeıli ózgeristerge jol ashty. «Búginde azamattar men kásipkerlerdiń memlekettik organdarǵa qarsy isterde 60 paıyzǵa deıin jeńiske jetýi – osy reformalardyń naqty nátıjesi», dedi Memleket basshysy.
«Júrgizilgen reformalar sot júıesine senimdi aıtarlyqtaı arttyrdy. Sýdıalardy irikteý jáne taǵaıyndaý úderisin ádil ári ashyq etip, olardyń táýelsizdigin kúsheıtti. Sot ákimshiligi jetildirilip, sot isin júrgizýdi sıfrlandyrý bastaldy. Buryn azamattar iske qatysty shaǵymdaný múmkindigi joqtyǵyna jıi aryzdanatyn. Sondyqtan kassasııalyq sottardy qurý jáne bıylǵy 1 shildeden bastap «jappaı» kassasııa qaǵıdatyn engizý Qazaqstannyń sot júıesin jańǵyrtýdaǵy mańyzdy qadamdardyń biri boldy. Konstıtýsııalyq reforma nátıjesinde prokýratýra organdarynyń qadaǵalaýshylyq quzyreti kúsheıtildi. Adam quqyqtary jónindegi ýákil konstıtýsııalyq mártebege ıe boldy. Elimizdiń barlyq aımaǵynda ókildikteri ashyldy. Endi Ýákildiń táýelsizdigi men ımmýnıtetine Ata zań kepildik beredi. Budan bólek, Ombýdsmen Bas prokýror sııaqty Konstıtýsııalyq sotqa júginý quqyǵyna ıe boldy», dedi Prezıdent.
