Uıymdastyrýshylardyń pikirinshe, qala mektepteriniń oqýshylarǵa, ata-analarǵa, ustazdarǵa tartymdylyǵyn arttyrýda bul jobanyń mańyzy joǵary. «Mektepke arnalǵan mektep» jobasyna qaladaǵy №47, №20, №40 jalpy bilim mektepteri men O. Jandosov atyndaǵy №105 gımnazııa qatysady.
«Qazir ǵalamdaǵy ózgerister adamzattan asqan jyldamdyqty talap etip jatyr. Bul bilim salasynyń jańarýyna, zamanaýı tehnologııalardy jyldam meńgerýdi meńzeıdi. Osy oraıda tartymdy mektepter qataryn kóbeıtý ýaqyt talabynan týyndap otyr. Tartymdy mektepter ınfraqurylymymen ǵana emes, bilikti pedagogter, jańa zamanǵa laıyq mamandar, bolashaqtyń mamandaryn tárbıeleýge baǵdarlanǵan ádistemelik keshenimen erekshelenedi. Búgingi qalyptasqan jaǵdaıda tartymdy mektepterge suranystyń joǵary ekenine kóz jetkizip otyrmyz. Tartymdy mektep – óz betinshe dara bolyp tabylatyn, ıaǵnı oqýshylar oqýǵa asyǵatyn, ata-analar balasyn ornalastyrýǵa umtylatyn, al ustazdar jumys isteýge qushtar bilim ordasy. Ondaı mektepterde pedagogter jumysyn tastap ketpeıdi, oqýshylar zor qulshynyspen bilim alady, ata-analar bilim oshaǵyn qoldaýǵa árdaıym daıyn turady. Mundaı mektepterde ár balaǵa jekelegen ádistemelik baǵdar qarastyrylǵan. Búginde balalar qaýipsizdigi basty nazarda turǵan kezeńde tartymdy mektepter qataryn kóbeıtý arqyly bilim salasyndaǵy olqylyqtardy joıýǵa bolady. Balalarǵa sapaly bilim berý, qaýipsizdigin qamtamasyz etý mektep pen ata-ananyń jaýapkershiliginde. Olaı bolsa, tartymdy mektepter qataryn kóbeıtý arqyly balalardyń jarqyn bolashaǵyn qamtamasyz etýge barshamyz atsalysýǵa mindettimiz», deıdi Almaty qalasy ákiminiń janyndaǵy Áıelder isteri jáne otbasylyq-demografııalyq saıasat jónindegi komıssııa múshesi, «EDU Stream» halyqaralyq til akademııasynyń bas dırektory Natalıa Muhamedjanova.
Bilim salasyndaǵy teńsizdikti joıýdy maqsat etip otyrǵan áleýmettik joba tańdalǵan mektepterdegi bilim kórsetkishin arttyrýǵa qoldaý kórsetip, tálimgerlik arqyly qoǵamdyq bastamalardy jumyldyra otyryp, áleýetin kóterýge kúsh salady. «Mektepke arnalǵan mektep» qanatqaqty jobasy bir jyl kóleminde «1 mektep-mentor + 3 mektep-mentı» formatynda tikeleı jumys isteıdi. Mentor qyzmeti O.Jandosov atyndaǵy №105 gımnazııaǵa júktelgen. Gımnazııa mektep-mentılerdiń basqarýshy personal júıesin retteý men damý strategııasyn qalyptastyrýǵa, biliktiligin kóterýge yqpal etetin bolady. №105 gımnazııa dırektorynyń ǵylymı-ádistemelik jumystar jónindegi orynbasary Elmıra Molotovanyń aıtýynsha, búginde túlekteri elimizdiń jáne sheteldiń oqý oryndaryna túsýde joǵary nátıjege qol jetkizip otyrǵandyqtan, mektep muǵalimderi IýNESKO jáne IB jobalarynda mol tájirıbesimen bólisýge daıyn.
Joba aıasynda tegin mentorlyq jumys kezeń boıynsha tórt baǵytta júzege asatyn bolady. Onda ákimshilik-basqarýshy personalmen, pedagogter quramymen, oqýshylarmen, ata-anamen jumys josparlanǵan. Joba bastamashylary máseleni jan-jaqty qarastyrý arqyly osy úrdiske qatysy bar taraptardy qamtı otyryp, oń nátıjege qol jetkizýge bolady degen senimde.
Jobaǵa iriktelgen mektep-mentıler – joǵary kórsetkishti maqsat etetin bilim alýshylarǵa sapaly ári nátıjeli bilim berýdi kózdeıdi. Sáıkesinshe, «3 mektep-mentı» – № 47, № 20, №40 jalpy bilim mektepteri qalanyń ártúrli aýdanynan tańdalǵan. Kórsetkishi ortasha bolǵanymen, bolashaqta bir maqsatqa qol jetkizýdi kózdeıdi.
Joba aıasynda jasóspirimderge kásip tańdaýǵa jáne ata-analarǵa bolashaqta kásibı turǵyda ósýge qoldaý kórsetiledi. Jasóspirim balasy bar ata-analarǵa «ata-ananyń róli qaı jerde aıaqtalyp, qaı jerde ustazdyń jaýapkershiligi bastalatynyn» koýchıng arqyly túrli kómek quraldaryn usynatyn bolady. Sonymen qatar pedagogter quramyna oqytýdy uıymdastyrý, ádistemelik oqýlyqtar jıyntyǵyn usyný, bilim berý ádisin túzetý, assessment, talanttardy basqarý jaǵynan ádistemelik kómek kórsetý jáne basqarý júıesine qatysty keńes berý kózdelgen.
ALMATY
