Onyń ashylýynda oblys ákimi Nurlybek Nálibaev aýyl turǵyndaryn ıgi bastamanyń iske asýymen quttyqtady.
«Buǵan deıingi salynǵan mektep ǵımaratynyń sapasy syn kótermeı, apatty jaǵdaıda dep tanylǵandyqtan, aýyl balalary ýaqytsha ákimdik ǵımaratynda bilim alyp keldi. Osy jaǵdaıdy eskerip, ótken jyly demeýshilik esebinen mektep ǵımaratyn qaıta salýdy qolǵa alǵan bolatynbyz.
О́ńirimizde árbir balanyń shyǵarmashylyqpen, sportpen aınalysýyna memleket tarapynan barlyq múmkindik jasalyp otyr. 2022 jyldan beri óńirimizde jańadan 15 mádenıet nysany boı kóterip, el ıgiligine berildi. Assambleıanyń 30 jyldyǵy aıasynda «Qazatomónerkásip» ulttyq atom kompanııasynyń» qoldaýymen Dostyq úıiniń jańa ǵımaraty boı kóterip keledi. Nysan aldaǵy qarasha aıynda paıdalanýǵa beriledi. Keıingi úsh jylda 20 sport kesheni iske qosyldy. Bıyl taǵy 6 sport kesheni kelýshilerge qyzmetin bastaıdy. Bıyl «Qazaqstan halqyna» qorynyń qoldaýymen Shıeli, Jalaǵash aýdandarynda jańa sport keshenderi tabystaldy. Qordyń demeýshiligimen múmkindigi shekteýli jandarǵa arnalǵan dene shynyqtyrý-saýyqtyrý kesheni salynyp jatyr.
Jańa oqý jylynda shákirtterge tabys, ustazdarǵa shyǵarmashylyq shabyt, ata-analarǵa qýanysh tileımin!» dedi oblys ákimi.
Jıynda óńirdiń áleýmettik-ekonomıkalyq damýyna úles qosqan azamattar Qyzylorda oblysynyń Qurmet gramotasymen, oblys ákiminiń Alǵys hatymen marapattaldy.
Oblysta bilimge bólinetin qarjy kólemi jyl sanap artyp keledi. Bıyl sala bıýdjeti 346 mlrd 800 mln teńgege jetti. Qaıtarylǵan aktıvter esebinen 8 mlrd 200 mln teńgege 5 mekteptiń qurylysy qarjylandyrylady.
Qosymsha bilim júıesin damytý maqsatynda úsh jylda 4 «Oqýshylar úıi» men 2 «О́ner mektebi» salynyp, jas urpaqtyń jan-jaqty bolyp ósýine jaǵdaı jasaldy. О́tken jyly «QazMunaıGaz» ulttyq kompanııasynyń demeýshiligimen zamanaýı «Oqýshylar saraıy» ashyldy. Balalar men jasóspirimderge arnalǵan «Syr juldyzdary» shyǵarmashylyq-ınnovasııalyq akademııasy jyl ortasynda paıdalanýǵa berildi. Al jańa oqý jyly qarsańynda Shıeli aýdanynda «Oqýshylar úıi» men «О́ner mektebi» saltanatty túrde el ıgiligine tabystaldy.
Qazir qaıta jańǵyrtylyp jatqan Prezıdent saıabaǵynan jyldyń tórt mezgilinde jumys isteıtin 300 oryndyq tynyǵý lageri, Botanıkalyq bilim ortalyǵy boı kóterip jatyr.
Aralda aýdan ortalyǵynan keıin turǵyndarynyń sany kóp eldi mekenniń biri – Sekseýil kenti. Tórt mektebi bar úlken kentte taǵy bir bilim oshaǵy esigin aıqara ashty. Úsh júz oryndyq «Keleshek mektebiniń» ashylý rásimine Parlament Senaty men Májilisi depýtattary Naýryzbaı Baıqadamov, Rýslan Rústemov, Murat Ábenov, Murat Ergeshbaev, «Qazaqstan halqyna» qoǵamdyq qorynyń basqarma tóraǵasy Lázzat Shyńǵysbaeva men zııaly qaýym ókilderi qatysty.
Oblys ákimi turǵyndardy jańa mekteptiń ashylýymen quttyqtap, bilim salasyndaǵy jetistikterge toqtaldy.
О́ńirde 2023 jyldan beri oblystyq bıýdjet esebinen 5 mlrd 700 mln teńgege 9 mektep janynan 2 900 oryndyq qosymsha ǵımarat salynypty. Osynyń arqasynda úshaýysymdyq mektepter máselesi túbegeıli sheshimin taýyp otyr. Bıyl oblystyq bıýdjetten 2 mlrd 400 mln teńge bólinip, 9 mektep qaıta jańǵyrtýdan ótti. Keıingi úsh jylda 15 mektep ǵımaratyna kúrdeli jóndeý júrgizilip, apatty jaǵdaıdaǵy 7 mekteptiń máselesi tolyq sheshimin tapty.
О́ńirde bilim salasyn damytýǵa túrli qorlar da úles qosyp keledi. Sonyń bir dáleli – Qyzylorda qalasynan «Bilimdi qoldaý qory» arqyly 8 mlrd 400 mln teńgege salynǵan daryndy balalarǵa arnalǵan fızıka-matematıka baǵytyndaǵy mektep-ınternat. Munda oqý úshin elimizdiń 17 óńirinen 1 445 oqýshy ótinish bildirip, joǵary kórsetkishterge qol jetkizgen 200 bala qabyldandy. Osy qor esebinen Aral aýdanyndaǵy Mergensaı eldi mekeninde 2 mlrd 333 mln teńgege 150 oryndyq zamanaýı mektep qurylysy júrip jatyr.
О́ńirimizdegi apatty dep tanylǵan 3 bilim ordasyn respýblıkalyq bıýdjet esebinen jańadan salý josparlanyp otyr. Oblysta ótken jyly 31 mlrd 800 mln teńgege 13 bilim uıymy jańadan ashyldy.
Jıynda «Qazaqstan halqyna» qoǵamdyq qorynyń basqarma tóraǵasy Lázzat Shyńǵysbaeva sóz sóılep, óńirimizdiń áleýmettik-ekonomıkalyq damýyna úles qosqan azamattar marapattaldy.
Qyzylorda oblysy,
Aral aýdany
