«Qazaq-qytaı qatynastary ǵasyrlardan beri senimge negizdelip keledi. Bul – bizdiń memleketaralyq baılanystarymyzdyń myzǵymas tuǵyry», – dedi Memleket basshysy.
Onyń aıtýynsha, ózara senimsiz eshqandaı strategııalyq seriktestik uzaqqa barmaıdy.
Prezıdent eki el arasyndaǵy tarıhı taǵdyrlastyq pen mádenı jaqyndyq seriktestikti nyǵaıtyp otyrǵanyn atap ótti. «Qazaqstan men Qytaı – Uly Jibek joly zamanynan taǵdyrlas elder. Halyqtarymyzdy ortaq tarıh, ortaq dástúr jáne ózara qurmet biriktirip keledi», – dep jazdy Toqaev.
Sondaı-aq ol saıası dıalogtyń qarqyny seriktestiktiń turaqtylyǵyn qamtamasyz etetinin aıtty.
«Joǵary deńgeıdegi saparlar men belsendi saıası dıalog máńgilik ári jan-jaqty strategııalyq seriktestik rýhyn kúsheıte túsedi», – dep málimdedi Prezıdent.
Toqaevtyń pikirinshe, qazirgi álemdegi kúrdeli jaǵdaıda Qazaqstan men Qytaıdyń ózara yqpaldastyǵy halyqaralyq qatynastarda turaqtylyq faktory bolyp otyr.
«Bizdiń berik baılanystarymyz jahandyq syn-qaterler jaǵdaıynda da seriktestiktiń qanshalyqty myqty ekenin kórsetip otyr», – dedi ol.
Prezıdent Qazaqstan men Qytaıdyń jańa tarıhı kezeńniń toǵysynda turǵanyn da atap ótti.
«Biz ortaq maqsattarymyzǵa súıene otyryp, birge áreket etemiz. Osy arqyly kez kelgen zamanaýı syn-qaterdi eńserip, órkendeýdiń jańa kezeńine jol asha alamyz», – dep túıindedi Toqaev.
