Muqan BALAPANOV, soǵys ardageri:
– Otan qorǵaýshy kúnine oraı ári Uly Jeńistiń 70 jyldyǵyna oraılastyrylyp otyrǵan myna áskerı sherý tuǵyrymyzdyń myqtylyǵyn pash etti. Uly Otan soǵysyna qatystym. Jasym 92-de bolsa da qazirgi jasalyp jatqan jaqsylyqtardyń barlyǵynan habardarmyn. Elimizdiń alǵa qoıǵan aýqymdy mindetteri júzege asýy úshin Elbasy N.Nazarbaevtyń qaıta saılanýy kóńilimizdi qýantty.
Sonaý surapyl soǵys bastalǵanda men 17-18 jasar balań jigit edim. Stalıngradtaǵy qııan-keski urysqa aralastym. Belarýs pen Polshany azat etý kezinde jaralandym. Ekinshi toptaǵy múgedektigim bar. Keıingi urpaqqa aıtarym, birlikterińdi saqtap, bizderdiń basymyzdan keshirgendi endi qaıtyp kórmeńder. Alla amandyǵyn bersin. Qazaqstan máńgilik bolyp, qazaǵymnyń mártebesi árqashanda arta bersin!
Amangeldi SULTAN,
Armııa generaly S.Nurmaǵanbetov atyndaǵy «Jas ulan» respýblıkalyq mektebiniń shákirti:
– Birinshi ret áskerı sherýge qatysyp otyrmyn, kóńil-kúıim jaqsy. О́zim Qyzylorda qalasynan bolamyn. Qazir «Jas ulan» mektebinde 8-synypta oqımyn. Ekinshi dúnıejúzilik soǵysqa qatysqan atalaryma alǵysym sheksiz, óıtkeni, olar qazirgi táýelsiz elimizdiń irgetasyn qalaýǵa atsalysty. Uly Jeńiske 70 jyl tolýyna oraı ótkizilip otyrǵan myna áskerı sherý de sol batyr babalarymyzdyń erligin keshegi qııan-keski soǵysta qaıtalaǵan atalaryma arnalyp otyr.
Meniń endigi tilegim, aspanymyz ashyq bolyp, ardagerlerimiz qurmet pen qoldaýǵa ıe bola bersin. Bolashaqta men de solar sııaqty aıanbaı óz Otanyma qaltqysyz qyzmet etip, qajet bolsa qolyma qarý alyp qorǵaımyn da.
Tatıana PLOTNIKOVA,
úı sharýasyndaǵy áıel:
– Áskerı sherýdi tamashalaý úshin ádeıi balalarymdy da ala keldim. «Otan otbasynan bastalady», dep jatýshy edi. Osy aıtýly merekede tek otaǵasyn ǵana quttyqtap qoımaı, elmen birge qýanyp, ózimizdiń merekelik kóńil-kúıimizdi kópshilikpen bóliskimiz keldi. О́ıtkeni, bizdiń memleketimizde barlyq etnos ókilderi beıbit jaǵdaıda ómir súrip jatyr. Adamda bir ǵana Otan bolýy qajet bolsa, ol – bizdiń Qazaqstan.
Keshegi órimdeı qyzdar men jigitterdiń ortaq Otanymyz bolǵan Keńester Odaǵyn qorǵaýǵa attanýy jáne de qıyn-qystaýda jaýyn jeńýi shynymen de úlken qurmetke laıyq. Qazir sol soǵys ardagerlerinen aramyzda qalǵany saýsaqpen sanarlyqtaı. Endigi bizdiń qolymyzdan keletini, sol ardagerlerimizge barynsha qurmet kórsete bilýimiz. Balalarymyzdyń beıbitshilikte ómir súrýine sol ardagerlerimiz óz jandary men densaýlyqtaryn bergen joq pa. Sondyqtan da men ózimniń jáne otbasymnyń atynan basymdy ıip, úlken rahmetimdi aıtamyn.
Erkebulan О́MIRZAQOV,
Almaty oblysynyń turǵyny:
– Elordamyzda ótip jatqan áskerı sherýge 16 ardagerimizdi Almaty oblysynan ádeıi alyp kelip otyrmyz. Sondaǵy nıetimiz, jan alysyp, jan berisken sonaý surapyl soǵystaǵy ardagerlerimiz erlikteriniń esh ketpegenin, qazirgi Astanamyzdyń aıshyqtanyp, álemge tanylyp jatqanyn óz kózderimen kórip, sezinsin degen oı edi. Shynymen de jeńisti alyp bergen ardagerlerimizge qurmetimiz sheksiz.
Kezinde KSRO-nyń taǵdyry úshin kúresken atalarymyz ony ortaq otanymyz dep qabyldasa, elimiz táýelsizdigin alǵannan keıin de olardyń kóńiline qaıaý túsken joq. Qaıta elmen birge qıyndyqtarǵa moıymaı, tek jaqsylyq tileýmen keledi. Sol keshegi jaýyngerlerimizdiń eńbekteri aqtalyp, qazirgi beıbitshilikte ómir súrip jatqanymyzdyń kórinisi dep bilemin myna áskerı sherýdi. Barshańyzdy Otan qorǵaýshy kúnimen quttyqtaımyn!
Kópbolsyn BEKMAǴANBET,
otstavkadaǵy polısııa polkovnıgi:
– Otan qorǵaýshy kúnin mynadaı jaıma-shýaq kúnde qarsy alyp jatyrmyz. Renjip júrgen adam kórmedim, qaıta barlyǵynyń kóńil-kúıi kóterińki. Qaı jaǵynan bolsa da qurmetke laıyq ardagerlerimiz elimizdiń ár óńirinen arnaıy kelip, myna áskerı sherýdi tamashalaýda. Egde jasqa kelgenderine qaramaı, óz eńbekteriniń janǵanyn kórý úshin kelse, biz de solarǵa qarap bir jasap qalǵandaı boldyq.
Erlikke taǵzym ete biletin halyqpyz ǵoı. Otan qorǵaýshy kúninde ardagerlerimizden úlgi alyp, jigerimizdi janı tússek, sonyń ózi el tuǵyrynyń myǵym bolýyna ózindik septigin tıgizedi dep senemin. Áskerı sherýge keler bolsam, bul dástúrli ótkizilip turatyn sherý jyldan-jylǵa jańa áskerı qarý-jaraqtarmen tolyǵyp, áskerimizdiń aıbyny asqaqtaı túskendigine kóz jetkize túsemin. Kóńilim tolady. Jáne de barsha qazaqstandyqtardy Otan qorǵaýshy kúnimen jáne Uly Jeńistiń 70 jyldyǵymen quttyqtaımyn!
Jazyp alǵan Asqar TURAPBAIULY,
«Egemen Qazaqstan».
