Sonyń aıǵaǵy retinde bıyl «Marııam» sharýa qojalyǵy alǵash ret qaýyn egip otyr. Jalpy, 280 gektar jerdi ıgergen qojalyq eńbekkerleri 2 gektarǵa tórt túrli qaýyn otyrǵyzyp, gektaryna 40 tonnadan ónim aldy.
«Qaýyn elimizdiń ońtústiginde kóp ósiriledi. Bıyl biz de tájirıbe retinde egip kórdik. Eńbegimiz aqtalyp, ónim óte sapaly shyqty. Táttiligine ózge kásipkerler de tańǵaldy. О́nimdi negizinen Almatydaǵy iri bazarlarǵa jóneltýdemiz. Endigi jyly qaýyn alqabyn ulǵaıtýdy josparlap otyrmyz», deıdi qojalyq basshysy Bekzat Zamanbekov.
Qojalyq budan bólek 220 gektarǵa júgeri, 20 gektarǵa baqsha daqyldaryn, 14 gektarǵa pııaz, 30 gektarǵa jońyshqa ekken. Aldaǵy ýaqytta egistik aýmaǵyn 500 gektarǵa deıin keńeıtýdi josparlap otyr. Sonymen qatar sharýashylyq ıesi memleket tarapynan ınfraqurylymdy damytýǵa sýbsıdııa alý úshin qujattar rásimdep jatqanyn aıtty. Buǵan deıin «Keńdala-2» baǵdarlamasy arqyly 40 mln teńge nesıe alyp, isin ilgeriletken.
Sharýalardyń qut mekenine aınalǵan Sheńgeldide pııaz egýmen aınalysatyn «Baýyr» sharýa qojalyǵy bıyl 70 gektar aýmaqty ıgergen. Qazir 20 gektardan 1 600 tonna ónim aldy.
Jalpy, Sheńgeldide 11 769 gektar jer ıgerildi. 13 sharýa qojalyǵy 2 000 gektar aýmaqta sý únemdeý tehnologııalaryn qoldanýda (900 gektaryn – jańbyrlatyp, 1 100 gektaryn – tamshylatyp sýarý). Bıylǵy naýqan kezinde 315 tonna bıdaı, 3 127 tonna arpa, 1 750 tonna kartop, 1 950 tonna pııaz, 4 430 tonna baqsha daqyly jáne 21 247 tonna mal azyǵyn jınaý kózdelgen.
Kúzgi dala jumysyna 119 tonna arzandatylǵan dızel otyny bólinip, sharýalarmen kelisimshart jasalǵanyn atap ótken jón.
Almaty oblysy
