«Amanat» partııasynyń «Halyqpen birge!» saılaýaldy baǵdarlamasy aıasynda boı kótergen nysan Ata zańnyń 30 jyldyǵy merekesi qarsańynda paıdalanýǵa berildi. Qurylysyna memleketke qaıtarylǵan zańsyz aktıvterden 263 mln teńge bólingen jańa nysannyń ashylýyna turǵyndar taıly-taıaǵy qalmaı jıyldy.
Aýdan ákimi Qaıyrjan Jaqsymbetov jalpy aýmaǵy 70 sotyq jerge salynǵan 264 sharshy metrdi quraıtyn jańa ǵımarat bir mezette 40 adamǵa deıin qabyldaýǵa múmkindik beretindigin atap ótti.
«Feldsherlik-akýsherlik pýnkt – aýyl turǵyndary úshin qoljetimdi ári sapaly medısınalyq kómektiń kepili. Ǵımarat zamanaýı jabdyqtarmen tolyq qamtylǵan. Munda alǵashqy qabyldaý, júkti áıelderge arnalǵan arnaıy kabınet, egý, prosedýralyq bólmeler qarastyrylǵan. Aýyz sý qubyry, káriz júıeleri tartylǵan. Aldaǵy ýaqytta aýdanda osyndaı taǵy eki medısınalyq pýnkt ashý josparlanyp otyr», – dedi aýdan basshysy.
«Amanat» partııasynyń ókilderi jobany aýyldaǵy densaýlyq saqtaý sapasyn artyrýǵa baǵyttalǵan mańyzdy qadam dep baǵalap otyr. О́ıtkeni endi turǵyndar dárigerge qaralý úshin aýdan ortalyǵyna sabylmaıdy.
«Taldaý tapsyrý úshin endi aýdan ortalyǵyna barýdyń qajeti joq. Tipti qajet bolǵan jaǵdaıda qaladaǵy aýrýhanalarǵa joldama beriledi. Bul – partııanyń aýyldarda medısınalyq kómekti jaqyndatý baǵytynda júrgizip kele jatqan júıeli jumysynyń nátıjesi», – dedi «Amanat» partııasy Ile aýdandyq fılıalynyń tóraǵasy Almasbek Satybaev.
Jobanyń taǵy bir ereksheligi – onyń qarjylandyrý kózi. Jańa medısınalyq pýnkttiń qurylysyna memleketke qaıtarylǵan zańsyz aktıvterden bólingen qarajat jumsaldy. Ile aýdanynyń prokýrory Baýyrjan Tólendınovtiń aıtýynsha, mundaı bastama – zań ústemdigi men áleýmettik ádilettiliktiń naqty kórinisi.
«О́ńirde zańsyz shyǵarylǵan aktıvterdi memleketke qaıtarý baǵytynda júıeli jumys júrgizilip jatyr. Sol qarajat esebinen halyqqa qajetti áleýmettik nysandar salynbaqshy. Búgin qoldanysqa berilgen medısınalyq pýnkt – sonyń naqty aıǵaǵy. Qazirde oblysta osyndaı 22 nysannyń qurylysy júrip jatyr», dedi ol.
Aıta keteıik, bıyl Almaty oblysynda «Amanat» partııasynyń saılaýaldy baǵdarlamasy aıasynda 15 dárigerlik ambýlatorııa, 12 feldsherlik-akýsherlik pýnkt, 11 medısınalyq pýnkt salý josparlanǵan.
Sonymen qatar aýyldarǵa jas mamandardy tartý úshin de naqty is-sharalar qolǵa alynǵan. Partııanyń bastamasymen asa tapshy mamandyq ıelerine 8,5 mln teńge kóleminde bir rettik tólem qarastyrylǵan. Tek shart boıynsha dárigerler keminde bes jyl aýylda qyzmet etýge mindetti.
Almaty oblysy
