Foto: South China Morning Post
Chinese Journal of Space Science jýrnalynyń derekterine sáıkes, jańa tehnologııa «Tıangýn» orbıtalyq stansııasyna jáne bolashaq aı bazalaryna jetkiziletin kıim kólemin 60%-dan astam qysqartýǵa múmkindik beredi. Mysaly, úsh adamnan turatyn ekıpaj úshin 15 jyldyq mıssııada bul 3,3 tonnadan astam kıim únemdeýge teń.
Buǵan deıin ǵaryshkerlerde orbıtada kıim jýý múmkindigi bolmaǵan. Olar kıimdi jaǵymsyz ıis shyqqansha kıe beretin, keıin paıdalanylǵan zattar arnaıy júk kapsýlalaryna salynyp, Jer atmosferasyna kirgende joıylyp otyrǵan.
Zertteý avtorlarynyń aıtýynsha, aldaǵy ýaqytta Aı men Marsqa uzaq merzimdi mıssııalardy júzege asyrýda ǵaryshta kir jýý tehnologııasynyń bolýy jerden jetkiziletin júktiń azaıýyna aıryqsha yqpal etedi.
Jańa qurylǵy keminde bes jylǵa eseptelgen. Ol mıkrogravıtasııa jaǵdaıyn eskerip jasalǵan, hımıkat qoldanbaı matany zararsyzdandyrady ári ylǵal men gazdyń syrtqa shyǵýyn boldyrmaıdy. Kelesi kezeńde ǵalymdar tolyqqandy jumys isteıtin prototıp jasap, qurylǵynyń tıimdiligin arttyrýdy josparlap otyr.
