Foto: Ashyq derekkóz
Eńbek jáne halyqty áleýmettik qorǵaý mınıstrliginiń habarlaýynsha, jyl basynan beri elimizdiń barlyq óńirlerinen 68,9 myń ótinim syrttaı formatta qaralǵan.
«Qazirgi tańda medısınalyq-áleýmettik saraptamany qashyqtan ótkizý 30 nozologııalyq nysan boıynsha júrgizilip jatyr. 2024 jyly 96,9 myńnan astam ótinim syrttaı formatta qaraldy, bul kýálandyrýdan ótken múgedektigi bar adamdardyń jalpy sanynyń 37,4%-yn quraıdy», delingen habarlamada.
Esterińizge sala keteıik, Ulttyq qoǵamdyq senim keńesiniń VI otyrysynda Memleket basshysy erekshe qajettilikteri bar adamdar úshin barynsha yńǵaıly jaǵdaı jasaýdy tapsyrǵan edi. Atap aıtqanda, azamattardyń túrli mekemelerge barýyn qysqartý, artyq qujat jınatýdy boldyrmaý jáne qyzmet alýshy men qyzmet kórsetýshi arasyndaǵy tikeleı baılanysty azaıtý mindeti qoıyldy.
Osy tapsyrmalardy oryndaý úshin QR Eńbek jáne halyqty áleýmettik qorǵaý mınıstrligi Densaýlyq saqtaý mınıstrligimen jáne Sıfrlyq damý, ınnovasııalar jáne aeroǵarysh ónerkásibi mınıstrligimen birlesip, Qazaqstannyń barlyq 20 óńirinde medısınalyq-áleýmettik saraptamany syrttaı formatta ótkizýdiń pılottyq jobasyn júzege asyryp otyr.
Múgedektik tobyn belgileý úshin azamattar tek turǵylyqty jerindegi emhanaǵa baryp, qajetti medısınalyq tekserýden ótedi. Qalǵan prosester aqparattyq júıelerdiń ıntegrasııasy arqyly ótinish berýshiniń qatysýynsyz júrgiziledi.
Syrttaı kýálandyrýdyń engizilýi birqatar artyqshylyqtarǵa jol ashty. Atap aıtqanda:
- Ákimshilik jáne bıýrokratııalyq kedergiler azaıdy;
- Saraptamalyq sheshimderdiń ashyqtyǵy qamtamasyz etildi;
- Áleýmettik qyzmetterdi úıden shyqpaı-aq alýǵa múmkindik berildi;
- Sybaılas jemqorlyq táýekelderi tómendedi.
