Foto: primeminister.kz
Kezdesýge Germanııa Týrıstik qaýymdastyǵynyń prezıdenti Norbert Andreas Fıbıg, jetekshi nemis týroperatorlarynyń ókilderi jáne Qazaqstan Respýblıkasynyń Týrızm jáne sport mınıstri Erbol Myrzabosynov qatysty.
Ermek Kósherbaev óz sózinde Qazaqstan úshin Germanııamen yntymaqtastyqtyń mańyzy zor ekenin atap ótip, týrızmdi ekijaqty seriktestikti damytýdyń mańyzdy baǵyty dep atady.
«Týrızm – tek ekonomıka salasy ǵana emes, sonymen qatar elderimiz arasyndaǵy senim kópiri. Germanııamen áriptestik Qazaqstannyń eýropalyq naryqtaǵy pozısııasyn kúsheıtip, jańa múmkindikterge jol ashady. DRV Destination Forum-dy Qazaqstanda ótkizý múmkindigin qarastyrý – ózara yntymaqtastyqty arttyrýǵa baǵyttalǵan mańyzdy qadam», dedi ol.
Kezdesýdiń basty taqyryptarynyń biri – Germanııada Qazaqstandy jańa týrıstik baǵyt retinde tanystyrý jáne 2026 jyly elimizde DRV Destination Forum ótkizý máselesi boldy.
Germanııa Týrıstik qaýymdastyǵynyń prezıdenti Norbert Andreas Fıbıg Qazaqstanǵa degen qyzyǵýshylyqtyń joǵary ekenin atap ótti.
«Elińizdiń tabıǵaty, baı mádenıeti men zamanaýı damýy Qazaqstandy nemis týrısteri úshin erekshe tartymdy etedi. Jyl saıyn nemis azamattary týrızmge 85 mlrd eýrodan astam qarjy jumsaıdy. Biz Qazaqstannyń olardyń tańdaýly baǵyttarynyń qatarynan laıyqty oryn alatynyna senimdimiz», dedi ol.
Nemis delegasııasynyń sapary barysynda qonaqtar Astana, Almaty jáne Baıqońyr qalalaryna baryp, eldiń týrıstik áleýetimen jáne birlesken jobalardy damytý múmkindikterimen tanysady.
Kezdesý sońynda Ermek Kósherbaev Qazaqstan men Germanııanyń birlesken kúsh-jigeri ekijaqty yntymaqtastyq pen dostyq qarym-qatynasty odan ári tereńdetetinine senim bildirdi.
