Oblys ákimi Serik Shápkenovtiń deregine qaraǵanda, jańa ǵımaratta úsh blok bolady. Onyń biri – 1200 oryndyq konsert zaly. Al ekinshi blokqa tarıhı-ólketaný mýzeıi ornalasady. Tarıhı jádigerler jınaqtalatyn blokta sıfrlyq jáne ǵylymı kitaphana, ǵylymı-zerthanalyq keshen, sheberlik bólmeleri, arhıvtik qor saqtaý orny men kórme zaldary, ekspozısııalyq keńistikterge oryn beriledi.
Sondaı-aq eki blokty «Dombyra» pishinindegi kórinis alańy baılanystyrady. Jobalaýshylar ulttyq aspap túrindegi alańda kassalyq galereıa qosalqy qyzmettik bólmelerdi ornalastyrýdy kózdepti.
«Memleket basshysy Atyraýǵa kelgen saparynda jańa mádenı ortalyq salý qajettigine nazar aýdardy. Oǵan uly kúıshi Qurmanǵazy atamyzdyń esimin berýdi usynǵan edi. Prezıdent tapsyrmasyna sáıkes eń úlken mádenı nysannyń qurylysy bastaldy. Bul ǵımarat tek arhıtektýralyq nysan emes, rýhanı jańǵyrýdyń jarqyn kórinisi, ult mádenıetiniń altyn kópiri, óner men ónegeniń ordasy bolady», deıdi Serik Shápkenov.
Atyraý oblysy
