Mundaı syrqattar tek adamnyń ózine ǵana emes, búkil qoǵamǵa, tipti ekonomıkalarǵa aýyr salmaq túsiredi. Uıym málimetinde:
«Mundaı syrqattar jeke adamdar men otbasylardyń medısınalyq shyǵyndaryn kóbeıtedi jáne álemdik ekonomıkaǵa úlken zalal keltiredi», delingen.
DDSU-nyń «Qazirgi álemdegi psıhıkalyq densaýlyq» baıandamasynda bul buzylystardyń taralýy jasqa da, tabys deńgeıine de baılanysty emes ekeni aıtylǵan. Olar barlyq elde, barlyq áleýmettik toptarda kezdesedi. Sonymen qatar zertteýlerde mundaı jaǵdaılar áıelderde jıirek baıqalatyny anyqtalǵan.
Ekonomıkalyq shyǵyn da az emes. Mysaly, tek depressııa men úreıli jaǵdaılardyń ózinen álemdik ekonomıka jyl saıyn 1 trıllıon dollar joǵaltady. Onyń ishinde emdelýge jumsalatyn tikeleı shyǵyndar da bar, alaıda negizgi shyǵyn eńbek ónimdiliginiń tómendeýinen týyndaıdy.
Uıymnyń pikirinshe, máseleni sheshý úshin memleketter psıhıatrııalyq qyzmetterdi ádil qarjylandyrýy kerek, adam quqyqtaryn qorǵaýǵa baǵyttalǵan zańdardy jetildirýi tıis, psıhıatr-dárigerler men mamandar daıarlaýǵa turaqty ınvestısııa salýy qajet.
DDSU úkimetter men halyqaralyq uıymdardy bul baǵytta shuǵyl reforma jasaýǵa shaqyryp otyr. Sebebi psıhıkalyq densaýlyq máseleleri tek jeke adamdardyń ǵana emes, tutas qoǵamnyń damýyna da tikeleı áser etedi.
