Foto: bbc.com
BUU baǵalaýy boıynsha, Gaza qalasy men onyń mańynda shamamen bir mıllıon adam turady. Izraıl HAMAS-tyń negizgi bekinisteri osy aýmaqta ornalasqanyn aıtyp, qalany tolyq baqylaýǵa alýǵa daıyndalyp jatyr.
COGAT – Izraıl Qorǵanys mınıstrliginiń Palestına aýmaqtaryndaǵy azamattyq isterdi qadaǵalaıtyn qurylymynyń málimetinshe, sońǵy kúnderi Gazanyń soltústiginen ońtústikke qaraı turǵyndardyń belsendi túrde kóship jatqany baıqalǵan. Soltústik aýdandardy shamamen 70 myń adam tastap ketken.
Halyqaralyq uıymdar eki jylǵa sozylǵan qaqtyǵys kezinde Gazadaǵy turǵyndardyń basym bóligi, ıaǵnı 2 mıllıonnan astam adamnyń keminde bir ret qonys aýdarǵanyn eske saldy.
Izraıl qonys aýdarýshylar úshin qaýipsiz gýmanıtarlyq aımaq jasaqtaýǵa ýáde berip otyr. Resmı jarııalanym jaqyn kúnderi kútiledi. Bul aımaq bosqyndar shoǵyrlanǵan ortalyq lagerlerden ońtústiktegi Ál-Mavası aýdanyna deıin, ári shyǵysqa qaraı jalǵasatyny aıtylyp otyr.
Alaıda halyqaralyq sarapshylar Izraıl soǵystyń alǵashqy kezeńinde Ál-Mavasıdy gýmanıtarlyq aımaq dep ataǵanymen, keıin ol jerge birneshe ret soqqy bergenin alǵa tartqan.
Halyqaralyq Qyzyl Krest qaqtyǵys júrip jatqan jaǵdaıda turǵyndardy qaýipsiz kóshirý múmkin emestigin atap ótti.
Tamyz aıynyń sońynda Gaza qalasynda asharshylyq resmı túrde tirkeldi. Bul týraly BUU agenttikteri, gýmanıtarlyq uıymdar men birqatar eldiń úkimetteri birigip júrgizgen jahandyq zertteý IPC qorytyndysy jarııalady.
Osy tusta Izraıl Gaza qalasyna operasııaǵa daıyndyqty kúsheıtip jatyr. Myńdaǵan zapas ásker shaqyrylǵan. Premer-mınıstr Bınıamın Netanıahý HAMAS tolyq joıylmaıynsha áskerı qımyl jalǵasatynyn málimdedi.
Izraıl armııasy qazirdiń ózinde Gaza qalasynyń shetine jetken. SAHAL derekkózderi shabýyldyń qyrkúıektiń ortasyna josparlanǵanyn habarlady.
Izraıldiń qaýipsizdik kabıneti bul sheshimdi bir aı buryn maquldaǵan. Áskerdiń basty maqsaty kepilde otyrǵan 48 adamdy bosatý. Olardyń ishinde 20-synyń tiri ekeni aıtylǵan.
