Bıyl jetpis jasqa tolǵan Amankeldi Kenenbaev Shymkenttegi Á.Qasteev atyndaǵy kórkemsýret ýchılıshesin úzdik bitirgen. Jıyrma bes jyl buryn Almaty qalasynda alǵash ret «Dlınnye svetnye sny» taqyrybynda jeke kórmesi ótken óner ıesi týǵan óńir tabıǵatyn rýh pen tirshiliktiń beınesi retinde sýretteıdi. Londondaǵy Ulybrıtanııa patshaıymy «Vıktorııa – Albert» jeke mýzeıi men Tokıo qalasyndaǵy NIW galereıasynda ótken halyqaralyq kórmege qoıylǵan týyndylary osy turǵydan kórermenderden joǵary baǵa aldy.
Kórmedegi ár kartınadan dalanyń keń tynysy seziledi. Týyndy taqyryby kózge anyq kórinetin beıneden bólek kómeskileý belgilerde turǵan sııaqty. Sý tasyǵan anasynyń artynan ıinaǵash ilip ergen qyz beınelengen «Jol» atty kartınaǵa anyqtap qarasańyz, eski súrleýdiń izin baıqaısyz. Baıqaısyz da, bárimizdiń de uly tirshilikke saparymyz osyndaı eleýsiz soqpaqtan bastalǵanyn endi bilgendeı bir sát únsiz qalasyz.
Myna bir týyndynyń aty – «О́tkinshi». Bet-júzi kórinbeıtin adamdar sulbasynan bir jylýlyq esip turǵandaı. Sálden soń baryp qalyń tumannyń arasynan sáýle shashqan jarqylmen astasqan qos beıne jastyq dáýrenniń belgisi ekenin uǵyna túsesiz. Boıaýlar arasynan ózińizge tanys belgi izdep, uzaq aıaldaısyz.
Keskindememen qatar músinshi retinde tanymal óner ıesi «Syr boıynyń batyrlary», «Janqoja batyr» monýmentteriniń, Fransııadaǵy Nojan-sıýr-Marn qalasynda ornatylǵan Mustafa Shoqaı eskertkishiniń avtory.
Oblystyq mádenıet, arhıvter jáne qujattama basqarmasy basshysynyń orynbasary Qýanysh Januzaqov, belgili qylqalam sheberleri О́miráli Ismaılov, Temirbek Saǵymbaev, Ǵanı Baıanov, Quralbek Qosýaqov qatysqan keshte áriptesteri kórme ıesin mereıli jasymen quttyqtap, qurmet kórsetti.
Kórmege sýretshiniń ár jyldardaǵy 70-ten astam týyndysymen qatar, jubaıy, qolóner sheberi Saltanat Qojantaevanyń kıizden jasaǵan buıymdary da qoıyldy. Jasóspirimderge arnalǵan dástúrli «Kilem toqý», «Asyl mura», «Shı toqý» úıirmelerin júrgizetin sheberdiń shákirtteri halyqaralyq «ART kunder house» baıqaýynda, respýblıkalyq «Ata-baba murasyn saqtaımyz jáne damytamyz» atty balalar shyǵarmashylyǵy kórmesinde birneshe márte júldeli orynǵa ıe bolǵan.
Qyzylorda
