Oblystyq dene shynyqtyrý, sport jáne týrızm basqarmasynyń basshysy Nurbol Sydyqovtyń aıtýynsha, bul báıge – ulttyq sportty dáripteý men jastardy otansúıgishtikke tárbıeleýge baǵyttalǵan mańyzdy shara. Eldiń birligin nyǵaıtyp, ulttyq salt-dástúr men sportty dáripteý kózdelgen.
Báıgeniń júlde qory – 10 mıllıon teńge. Máselen, 6 shaqyrymdyq taı jarysta Batys Qazaqstan oblysynan kelgen «Medına» atty júıriktiń ıesi birinshi oryndy oljalady. Al 9 shaqyrymdy quraǵan qunan báıgede Aqjaıyq aýdanynan qosylǵan «Bórte» sáıgúligi top jardy.
Top báıgeniń júırikteri 18 shaqyrymǵa shapty. Mańǵystaý oblysynyń tulpary – «Sarhan» márege birinshi jetti. Júırikti báıgege qosqan atbegige 1 mıllıon 200 myń teńge berildi.
Jurt alaman báıgeni asyǵa kútti. Alamannyń qashyqtyǵy – 24 shaqyrym. Bul saıysta «Aqbaıan» atty júıriktiń baǵy jandy. Jeldeı esken janýardyń ıesi 1 mıllıon 800 myń teńgeni ıelendi.
«Bul – men úshin erekshe jeńis ári qýanysh. Alǵash ret báıge atymen 7 jasymda shapqan edim. Úsh jyldan beri shabandozbyn. Alamanda aldyna qara salmaǵan «Sarhan» atalatyn júırikti Reseıden ákelingen», deıdi shabandoz Nasıhat Abdolla.
Atyraý oblysy
