Sýretterdi túsirgen – avtor
Memleket basshysy 2025 jyldy Jumysshy mamandyqtary jyly dep jarııalaǵany málim. Bul bastama – eńbek adamyna degen qurmettiń naqty kórinisi. Osy oraıda biz Almaty oblysynyń qyzmet kórsetý jáne tamaqtandyrý salasyndaǵy ınnovasııalyq tehnologııalar kolledjine arnaıy at basyn buryp, oqý ornynyń tynys-tirshiligimen tanysyp qaıttyq. Mundaǵy shákirtter men sheberlerdiń eńbek álemine kóńil súısinedi.
1978 jyldan beri elimizge qajetti jumysshy kadrlardy úzdiksiz daıarlaýmen aınalysatyn tájirıbeli oqý orny shashtaraz, tamaqtandyrýdy uıymdastyrý, tigin óndirisi, kıimderdi úlgileý, sán jáne dızaın, týrızm, qonaqúı servısi sekildi alty baǵyt boıynsha zamanaýı standarttarǵa saı bilim berip keledi.
Kolledj dırektory Baqytgúl Kishibaevanyń aıtýynsha, keıingi jyldardyń bederinde jastardyń kásiptik mamandyqtarǵa qyzyǵýshylyǵy arta túsken. Bul – qýantarlyq úrdis. Memleket tarapynan beriletin «Bilim berý granttary», «Jastar tájirıbesi», «Alǵashqy jumys orny» syndy baǵdarlamalar talapkerlerdiń jigerine serpin bergen.
«Búginde kolledjde 960 shákirt bilim alady. Olardyń barlyǵy memleket esebinen tegin granttarmen qamtylǵan. Olarǵa kúnine bir ýaqyt ystyq tamaq beriledi, jataqhana da qarastyrylǵan. Tehnıkalyq jáne kásiptik bilim berý – tek dıplom alý emes, naqty kásip ıesi atanýdyń joly. Sheberligimen elge qyzmet etip, adal eńbegimen tabys tabatyn jastardyń qatary artqan saıyn, qoǵam da jańaryp, ulttyq ekonomıkanyń irgetasy bekı túspek. О́ndiristik oryndarmen tyǵyz qarym-qatynas ornatyp kelemiz. Bul óz kezeginde túlekterimizdiń eńbek naryǵynda básekege qabiletti, ári suranysqa ıe maman retinde qalyptasýyna jol ashady. Sheteldik kásiporyndarmen aradaǵy yntymaqtastyq – halyqaralyq tájirıbe almasýǵa múmkindik týdyryp otyr. Kásiptik bilimdi damytý arqyly biz tek jumyssyzdyqty azaıtpaımyz, sonymen qatar el ekonomıkasynyń naqty sektoryn bilikti mamandarmen qamtımyz», deıdi Baqytgúl Kishibaeva.
Kolledj muǵalimderiniń aıtýynsha, stýdentterdiń kóbi oqý bitirmeı jatyp-aq turaqty jumys tabady. О́ıtkeni qazirgi tańda naryqta bilikti jumysshy tapshy. Al sheberligi shyńdalǵan, kásibin súıetin jastarǵa qashan da jol ashyq.
Kolledj halyqaralyq yntymaqtastyqty belsendi damytyp keledi. Oqý orny birneshe sheteldik bilim uıymdarymen jáne kásiporyndarmen yntymaqtastyq týraly memorandýmǵa qol jetkizgen. Kolledj shákirtteri kúni búgin Túrkııa, Birikken Arab Ámirligi, Fransııa sekildi damyǵan elderdiń úzdik qonaqúıleri men meıramhanalarynda bas aspaz sekildi jaýapty qyzmetterdi abyroımen atqaryp júr. Joǵaryda aıtylǵandaı, elimizde de mundaı mamandyq ıeleri joǵary jalaqyǵa ıe. Kolledj ustazdary elimizdegi úzdik meıramhanalarda aspaz bolyp eńbek etetin shákirtteriniń aldy aıyna 1 mln teńgege deıin jalaqy alatynyn aıtady.
«Biz mektepterge túrli kezdesýlerge baramyz. Sol sekildi túlekterdi kolledj qabyrǵasyna shaqyryp kásiptik mamandyqtardyń artyqshylyǵy týraly dáris ótkizemiz, ishtegi sehtarmen tanystyramyz. Keıingi jyldary mektep bitirýshilerdiń jumysshy mamandyqtarǵa qyzyǵýshylyǵy artqany baıqalady. Máselen bıyl bizge 550 bala oqýǵa tústi. Stýdentterimiz praktıka men teorııany qatar meńgerip, naǵyz bilikti mamanǵa aınalady. Megapolıstegi iri jumys berýshi uıymdarmen tyǵyz baılanys ornata otyryp, shákirtterimizdiń turaqty jumysqa ornalasýyna múmkindik týdyramyz», deıdi arnaıy pán oqytýshysy Jazıra Almasbaeva.
Kóptegen memlekette mundaı oqý oryndarynda bilim alyp júrgen shákirtter ózderi jasap shyqqan ónimderin satý arqyly qyrýar paıda tabady. О́kinishtisi, bizde mundaı múmkindik qarastyrylmaǵan. Eger osy másele zańmen rettelse, bilim ordasy ózin qarjylandyrýǵa jol ashar edi. Sheteldik tájirıbedegi osy tetik eskerilse deıdi mamandar.
ALMATY
