3 qyrkúıekte S.Tangal myrza elshilikte elimizdiń birqatar BAQ ókilderin qabyldap, óziniń aldaǵy jumysy jaıynda baıandap, eki eldiń baılanysyn odan ári tereńdetý týraly oılarymen bólisti.
«Men jaqynda Joǵary mártebeli Qasym-Jomart Toqaevqa Senim gramotasyn tabystadym. Qazaqstan sekildi ǵajaıyp ári jedel damyp kele jatqan elde Úndistan Respýblıkasynyń ókili retinde qyzmet etý – men úshin úlken abyroı. Úndistan men Qazaqstandy kópǵasyrlyq baı tarıhymyz, mádenı uqsastyǵymyz jáne ózara qurmet baılanystyrady. Qazirgi tańda bizdiń qarym-qatynasymyz strategııalyq seriktestik negizinde damyp keledi. Qazaqstan Úndistannyń «keńeıtilgen kórshilik» saıasatynda aıryqsha oryn alady», dedi elshi.
Onyń aıtýynsha, eki memleket BUU, ShYU, Azııadaǵy ózara yqpaldastyq pen senim sharalary jónindegi keńes sekildi uıymdar aıasynda senimdi odaqtas sanalady. Taraptar energetıka, farmasevtıka, aqparattyq tehnologııa, ǵaryshty ıgerý, qorǵanys, bilim, mádenı salalarda yntymaqtasyp jumys júrgizip keledi jáne áli de iske asyrylmaǵan ózara baılanys áleýetteri joǵary.
«Aldaǵy aılarda Qazaqstan Úkimetimen, bıznes qaýymdastyqpen, akademııalyq ortamen jáne jalpy qoǵammen baılanysymyzdy tereńdete beremiz degen úmittemin. О́zara barys-kelis, iskerlik mıssııalar jáne mádenı bastamalarymyz jalǵasyn taýyp, halyqtarymyzdyń jaqyndasýy men strategııalyq seriktestigimizdiń damýyna úlesimizdi qosa beremiz», dedi S.Tangal.
Elshimen kezdesý ózara pikir almasý túrinde ótip, jýrnalıster tarapynan ekonomıka, bilim, jasandy ıntellekt salalaryndaǵy baılanystar men tájirıbe almasýlar jóninde suraqtar qoıyldy. S.Tangal qazirgi tańda bizdiń elimizde, atap aıtqanda, Almaty, Astana, Qaraǵandy, Semeı, Petropavl qalalarynda 12 myńdaı úndi stýdenti bilim alatynyn, olardyń basym bóligi medısınalyq mamandyqtardy tańdaǵanyn atap ótti. Sonymen qatar keıingi jyldary Qazaqstanǵa keletin úndi týrısteriniń de sany artyp keledi.
