ASTANA. 18 aqpan. Reseı jazany oryndaý federaldy qyzmetiniń akademııasy 2014 jyly Reseıdiń túzetý mekemelerinde 28 myń 496 shet eldik azamattyń otyrǵanyn málimdedi. Bul týraly «Azııa-Plıýs» agenttigi habarlady.
Tájikstan aqparat agenttigi osy sheteldikterdiń tórtten bir bóligin tájikter quraıtynyn jetkizedi. Sottalǵan sheteldik azamattardyń eń kóp mólsheri bolyp tabylatyn bul kórsetkish 7 786 adamdy kórsetedi. Ekinshi orynda 6 846 azamaty Reseı túrmesiniń aýasyn jutqan О́zbekstan tursa, úshinshi orynǵa 2 964 azamatymen Ýkraına shyǵady. Al «lıderler tórttigin» 2 846 adamyn qulyp astyna bergen Ázerbaıjan tııanaqtaıdy.
«Izvestııa» gazetiniń aqparynsha, federaldy qyzmet Reseı kolonııalary men túrmelerinde jazalaryn ótep jatqan mıgranttardyń psıhologııasyn zertteıtin arnaıy tásildeme jasap jatyr. Buǵan sońǵy kezderi sottalýshy shet eldikterdiń kóbeıip bara jatqany áser etken.
«Eger 2013 jyly jazany oryndaý federaldy qyzmetiniń mekemelerinde 26,6 shet eldik azamattar jazalaryn ótese, 2014 jyly olardyń qatary 28,5 myńǵa deıin jetken. Jáne bulardyń 95 paıyzy jazany oryndaý mekemeleri basshylyǵymen baılanysqa shyqpaıdy, al árbir úshinshisi tártipti udaıy buzýshy bolyp keledi», - dep málimdeıdi basylym.
«Alaıda, mıgranttar jalpy sottalýshylardyń bar-joǵy 5 paıyzdan sál joǵary bóligin quraıdy, - deıdi jazany oryndaý federaldy qyzmetindegiler. – Biraq olar qylmysty negizinen Máskeý men oǵan jaqyn oblystarda jasaıtyn bolǵandyqtan, jazalaryn Ortalyq Reseıde ornalasqan kolonııalarda óteıdi».
Basylym mıgranttardyń 95,5 paıyzynyń mekemeler basshylyǵymen baılanys ornatpaıtynyn jáne tutqyndaǵy basqa adamdarǵa qaraǵanda, tártipti kóbirek buzyp, jazany artyǵyraq alyp turatynyn atap ótedi. TMD elderinen sottalǵan azamattardyń 32,7 paıyzy tártipti udaıy buzýshylar bolyp tabylady. Zertteý sondaı-aq olardyń 20 paıyzynyń ǵana yntalandyrý ala alatynyn bildiredi.
Sonymen qatar, jazalaryn ótep jatqan mıgranttardyń 90 paıyzy eńbekke jaramdy jastaǵylar bolyp tabylady. Olardyń 11,8 paıyzy sottalǵanǵa deıin 2 jyldyq eńbek ótilin ǵana alyp úlgergen. Budan ári 26,8 paıyzynda – 10 jyl, 43,2 paıyzynda 15 jáne odan da kóp eńbek ótilderi bar.
Murat Aıtqoja.
