Elordadaǵy Ulttyq mýzeıde belgili saıasatker Berik Ábdiǵalıulynyń «Umyt qalǵan batyrlar» («Zabytye geroı») atty kitabynyń tusaýkeser rásimi ótti. Kitapqa Keńes Odaǵynyń Batyry ataǵyna usynylǵan, alaıda, ártúrli sebeptermen ala almaı qalǵan qazaqstandyq has batyrlar týraly materıaldar toptastyrylǵan. Sondaı-aq, bir sózben aıtqanda jınaqqa «Halyq batyry» aksııasy aıasynda anyqtalǵan 10 otandasymyzǵa qatysty qujattar men naqty aıǵaqtar toptastyrylǵan eken. Bulardyń basym bóligi qazaqstandyqtar úshin áli de bolsa beımálim kúıinde qalyp otyrǵanyn eske sala ketsek deımiz. Kitapta Reseı Qorǵanys mınıstrliginiń muraǵatynan alynǵan materıaldary men qundy qujattary tuńǵysh ret jarııalanyp otyrǵany jáne bar.
Saltanatty sharany atalmysh mýzeı dırektory Darhan Myńbaı ashyp, kitap týraly jan-jaqty málimet berdi. Ol óz sózinde, el qorǵaǵan eren erlerimizdiń erligin halyq jadynda saqtaý úshin tek Jeńis kúninde ǵana emes, úzdiksiz nasıhat jumysyn júrgizý qajet ekenin basa aıtty.
Basqosý barysynda joba avtory Berik Ábdiǵalıuly: «Bul jaýyngerlerdiń barlyǵy da jan aıamaı erlik kórsetken batyrlar deýge bolady. Jas urpaq sol qaharmandarǵa qarap boı túzeıdi. Maqtan etedi. Otan úshin ot keshken batyrlarymyzdyń erligi óz dárejesinde dáriptelýi tıis. Negizinen bul jınaqqa Máskeýden alynǵan qujattar jınaqtalǵan», dedi.
Joba avtorynyń osydan bes jyl buryn Memlekettik tildi damytý qorynyń dırektory qyzmetin atqaryp turǵan kezinde qolǵa alǵan «Halyq batyry» baǵyty boıynsha Jeńistiń 70 jyldyǵy aıasynda júzege asyp otyr. Jobaǵa «Nur Otan» partııasynyń Qoǵamdyq saıasat ınstıtýty men «Baıkadam Holdıng» kompanııasy úlken qoldaý bildiripti. Taǵy bir aıta keterligi, atalmysh ıgi shara sońy «Jeńiske qurmet» atty kórmege ulasty. Mýzeıdiń «Ǵasyrlar qoınaýynan syr shertken Qazaqstan» jobasy aıasynda ashylǵan bul kórme negizi 2 bólimnen turady. Kórmeniń birinshi bóliminde «Qazaqstan soǵys jyldarynda» taqyrybyn qamtyp qazaqstandyq dıvızııa jaýyngerleriniń sýretteri, muraǵattyq qujattary, urys joldary, kartalar kórinis tapsa, ekinshi bólim «1942-1943 jyldardaǵy Stalıngrad shaıqasynyń» fotolarynan quralypty.
Raýshan TÁÝIRHANQYZY, jýrnalıst.
