Mınıstrliktiń málimetinshe, Astana, Bishkek jáne Tashkent 2026 jylǵa deıingi sý-energetıkalyq balans boıynsha kelisimge kelgen. 2025 jyldyń 7 qyrkúıeginde Sholpan-Ata qalasynda ótken kezdesýde Energetıka mınıstri Erlan Aqkenjenov Qyrǵyzstan jáne О́zbekstan ókilderimen birqatar hattamalarǵa qol qoıǵan.
Kelisimder sheńberinde úsh negizgi baǵyt qarastyrylǵan. Toqtaǵul sý qoımasynan sý jiberý tártibi rettelip, elimizdiń ońtústigi sýarmaly sýmen qamtamasyz etiledi. Sondaı-aq Qazaqstan men О́zbekstan Qyrǵyzstanǵa elektr energııasyn jetkizedi, bul úshin Reseı energııasy Qazaqstannyń júıeleri arqyly tranzıtteledi. Úshinshi kelisim boıynsha О́zbekstan 2026 jyldyń naýryzynan jeltoqsanyna deıin Qazaqstanǵa shamamen 900 mıllıon kVt-saǵat elektr energııasyn jetkizedi. Bul kezeńde eldiń ońtústigindegi elektr stansııalary jańǵyrtylady.
Energetıka mınıstri Erlan Aqkenjenov kelisimderdiń mańyzdylyǵyn atap ótti.
«Qol qoıylǵan hattamalar – kórsetkishteri, merzimi men baǵalary kórsetilgen naqty jumys qujaty. Biz jetkizýdiń tehnıkalyq sharttaryn naqtylap, ózekti máselelerdi sheshtik. Qazaqstan óz mindettemelerin tolyq oryndaıdy jáne seriktester tarapynan da osyndaı ustanymdy kútedi», dedi mınıstr.
Mınıstrlik dereginshe, 2024 jyly Qazaqstanda elektr energııasyn tutyný 4,3 paıyzǵa artqan. Qazirgi tańda el elektr energııasynyń negizgi bóligin Reseıden ımporttaıdy.
