Astanadaǵy Ulttyq mýzeıde «Stalıngrad shaıqasy» mýzeı-qoryǵy jáne Reseı áskerı-tarıhı qoǵamynyń Volgograd bólimimen birlesip Qazaqstan Mádenıet jáne sport mınıstrliginiń, Reseı Mádenıet mınıstrliginiń jáne «Habar» agenttiginiń qoldaýymen Ulttyq mýzeıdiń «Ǵasyrlar qoınaýynan syr shertken Qazaqstan» jobasy aıasynda «Jeńiske qurmet!» atty kórmeniń ashylý saltanaty bolyp ótti.
Sharaǵa jıylǵan qaýym bir mınýt únsizdik jarııalap, ómirden ótken maıdangerlerdiń rýhyna taǵzym jasady.
«Biz búgin Ulttyq mýzeıge ótkenimiz ben tarıhymyzǵa qurmet kórsetip, erlikke taǵzym jasaý úshin kórme ashyp jatyrmyz. Erlik eshqashanda umytylmaıdy. Búginde biz jeńgen eldiń urpaqtarymyz dep keýdemizdi kerip maqtanamyz. Qurmetti ardagerler, sizderdiń erlikterińizdi keıingi urpaqqa durystap jetkizsek, biz úshin úlken amanat sol. Biz sizderdiń aldaryńyzda barlyq ýaqytta taǵzym etemiz. Sizderdiń keýdelerińizdegi árbir marapat ór rýhtaryńyzdyń baǵasy. Qazirgi jastar sizderdiń jasaǵan erlikterińizdi estý, kórý, bilý arqyly ózderine qýat, jiger, rýh alady», – dedi kórmede Ulttyq mýzeıdiń dırektory Darhan Myńbaı.
Sondaı-aq, basqosýda Jeńistiń keıingi urpaqqa úlgi-ónege bolarlyq qasıetterine toqtala kelip: «Biz sizder jasaǵan erlikti, sizder kórgen qan maıdandy bolashaq jas urpaqqa jetkizýdi ózimizdiń paryzymyz dep sanaımyz», – dedi «Habar» agenttigi aksıonerlik qoǵamynyń basqarma tóraǵasy Aıdos Úkibaev.
Kórmeniń negizgi bólimindegi stendterge «Qazaqstan soǵys jyldarynda» taqyrybymen qazaqstandyq dıvızııalardyń sýretteri, muraǵattyq qujattary, urys joldarynyń kartalary jáne osy soǵys barysyndaǵy túbirli ózgeristiń bastaýy bolǵan «1942-1943 jyldarǵy Stalıngrad shaıqasy» kórmesiniń fotoqujattyq bólimi qoıylypty.
Keńes áskerleriniń Stalıngradty qorǵaǵan jáne nemisterdiń Edil men Don ózenderiniń aralyǵyna ornalasqan iri strategııalyq tobyn talqandaǵan jaýyngerlik áreketteri 1942 jyldyń 17 shildesi men 1943 jyldyń 2 aqpany aralyǵynda ótti. Stalıngrad maıdanynyń 120 bóliminiń jeke quramy men qyzmeti ornalasqan Batys Qazaqsstan oblysy maıdan irgesinde bolatyn. Stalıngrad úshin shaıqasqa Qazaqstanda jasaqtalǵan 9 áskerı dıvızııa qatysty. Qazaqstan halqynyń fashızmdi jeńýge qosqan úlesi «Soǵystyń basy, dıvızııalardyń jasaqtalýy», «Qazaqstandyqtar soǵys maıdanynda», «Qazaqstan – maıdan arsenaly», «Tyl eńbekkerleriniń Jeńiske qosqan úlesi», «Dańq shoqjuldyzy», «Batyrlar dańqy máńgi óshpeıdi! Bul – ólilerge emes, bul – tirilerge kerek!» atty stendterden kórinis taýypty.
Kórmeniń kelesi bólimine batyrlardyń jeke zattary, maıdannan jazǵan hattary, ordenderi men medaldary, Uly Otan soǵysy kezindegi qarýlar jáne t.b. eksponattar qoıylypty.
Berik SADYR, «Egemen Qazaqstan».
Sýretterdi túsirgen Edil ORMANOV.
