Foto: ashyq derekkóz
Prezıdent azamattarǵa kórsetiletin memlekettik qyzmetterdi sıfrlandyrý isinde Qazaqstannyń zor jetistikke jetkenin atap ótti. Biraq bıýrokratııalyq rásimder áli kúnge deıin bızneske kedergi bolyp otyr. Sıfrlandyrý isiniń maqsaty áli oryndalmaǵan.
Bul ahýaldy shuǵyl túzeý kerek. Eń aldymen, salyqtyq ákimshilendirýge nazar aýdarý qajet. Memlekettik kirister komıteti sıfrlandyrý úderisi boıynsha memlekettik organdar arasynda kósh bastaýǵa tıis. Bul mekeme jasandy ıntellektiniń jáne basqa da ozyq tehnologııanyń áleýetin salyq tóleýshilerdiń múddesine saı tıimdi qoldanýy kerek. Osy júıeli qadamnyń bári memleket pen bıznestiń arasyndaǵy qarym-qatynastyń múldem jańa, servıstik úlgisin jasaýǵa arnalǵan, - dedi Q.Toqaev.
Jańa Salyq kodeksi qazirgi normalar men rásimderdi ózgertýmen shektelmeýi kerek. Bul qujat salyq tóleýshilerdiń ashyqtyq pen adaldyqqa negizdelgen jańa tanym-túsinigi men bolmysyn qalyptastyrýǵa tıis.
Prezıdent memleket adal jumys isteıtin salyq tóleýshilerdiń múddesin qorǵaıtynyn, olardyń adal eńbeginen túsken salyqty elimizdi damytýǵa jumsaıtynyn atap ótti.
Salyqtan túsken ár teńge halyqtyń ıgiligine jumsalýǵa tıis. Bul – azamattarǵa sapaly memlekettik qyzmet kórsetilip, ınfraqurylym salynyp, memlekettik qoldaý sharalary usynylýy qajet degen sóz. Damý ınstıtýttary kásipkerlerdiń belsendiligin arttyrý isinde aıryqsha ról atqarýǵa tıis. Biraq olardyń jumysynda biraz kemshilik bar. Damý ınstıtýttarynyń qyzmetin ózgertetin kez keldi, - dedi Toqaev.
Prezıdent shyn máninde, bul qurylymdar naqty bir salaǵa baǵyttalǵan, tereń taldaý jasaýǵa qabiletti jáne ınvestısııa salýǵa quqyly tolyqqandy damý ınstıtýty retinde jumys isteýge tıis ekenin aıtty.
