Foto: nazarmedia.kz
«Ǵylym salasynda áli de memlekettiń úlesi basym. Biraq bıýdjet qarjysynyń qaıtarymy áli de shamaly bolyp tur. Jańa patentter, tehnologııalar men óndirister sııaqty kózge kórinetin naqty nátıje jetkilikti emes. Innovasııalyq saıasatty Ǵylym jáne joǵary bilim mınıstrliginiń quzyryna bergen jón. Mınıstrlik jáne Ǵylym akademııasy birlesip, ǵylymı ınstıtýttar men joǵary oqý oryndaryn úılestirý isimen belsendi túrde aınalysýy kerek», dedi Q.Toqaev.
Memleket basshysy jasandy ıntellektini keńinen qoldanatyn ýnıversıtetterge kóbirek derbestik berýdi usyndy.
«Sonymen qatar Úkimet daryndy zertteýshilerdi qoldaý úshin qosymsha sharalar qabyldaýǵa tıis. Bilikti mamandarymyzdy elge qaıtarýdyń tıimdi tásilderin oılastyryp, qoldanysqa engizý kerek. Kadr tapshylyǵyn joıý úshin kóshi-qon saıasatyn da qaıta qaraǵan jón. Shetelden elimizdi damytýǵa úles qosa alatyn myqty mamandardy ultyna qaramaı tartý – óte mańyzdy mindet. Olardyń Qazaqstanda qalýyna jaǵdaı jasaý kerek. Sebebi bizge bilikti mamandar óte qajet. Ásirese tehnıkalyq mamandyqtardy meńgergen óz isiniń naǵyz sheberleri kerek. Qazirgi tilmen aıtsaq, «sapasy joǵary adamı resýrstar» qajet. О́ıtkeni bilikti, sanaly adamdar – ulttyq ekonomıkanyń arqaýy, el bolashaǵynyń kepili», dedi Prezıdent.
