Prezıdenttiń sózinshe, Májilistiń qazirgi quramy barlyq zańdyq rásimder aıaqtalǵanǵa deıin óz jumysyn jalǵastyra beredi. Senat ta jalpyulttyq referendým qorytyndysy shyǵyp, jańa Parlament saılanǵanǵa deıin turaqty qyzmetin atqarady. Bul rette saıası partııalardyń da básekege daıyndalýyna jetkilikti ýaqyt beriledi.
«Depýtattarymyz naǵyz memleketshil azamat retinde bul máselege zor jaýapkershilikpen ári túsinistikpen qaraıdy dep oılaımyn. Túptep kelgende, saıası reformalardyń bári elimizdiń birtutas ınstıtýsıonaldy júıesiniń ajyramas bóligine aınalady», – dedi Memleket basshysy.
Sonymen qatar Qasym-Jomart Toqaev óz bastamasynyń nege aldyn ala jarııalanǵanyn túsindirdi.
«Árıne, zańdy suraq týyndaýy múmkin: Prezıdent Parlamenttik reforma jasaý qajettigi týraly nege sonshalyqty erte jarııalap jatyr? Áıtpese, saıası tehnologııanyń qaǵıdasyna sáıkes mundaı sharalar tosynnan, kútpegen jerden jasalady emes pe? Biraq men osyǵan deıin de aıttym, taǵy da qaıtalap aıtamyn: men elimizdiń jáne halqymyzdyń taǵdyryna qatysty qandaı da bir máselege kelgende tek qana ashyq saıasat júrgizý kerek dep sanaımyn. Mundaı aýqymdy reformany qoǵamnan qupııa ustaýǵa bolmaıdy dep esepteımin», – dedi ol.
Prezıdent osyndaı taǵdyrly máseleler boıynsha halyqpen ashyq suhbat júrgizý qajettigin basa aıtty.
«Sonda ǵana bárimiz bir el bolyp, Ádiletti ári Qýatty Qazaqstandy qurý jolynda taǵy bir mańyzdy qadam jasaımyz. Barshańyzǵa amandyq, tabys tileımin. Qazaqstanymyz máńgi jasaı bersin!» – dedi Qasym-Jomart Toqaev.
