9 mamyr! Osy aıtýly kúni men súıikti Otanymyzdyń túkpir-túkpirindegi ár soǵys ardagerin jeke-jeke quttyqtaǵym keledi! О́ıtkeni, olardyń barlyǵy osyndaı qurmetke laıyq jandar, erlikterine baǵa jetpeıdi, naǵyz batyrlar.
Kishkentaı kezimde atamnan onyń jasaǵan erlikteri týraly suraý oıyma kelmepti. Al qazir osy kemshiligime qatty ókinemin. Bir qýanyshtysy, Uly Jeńistiń 70 jyldyǵy qarsańynda Reseı Qorǵanys mınıstrliginiń «Halyqtyń qaharmandyǵy» dep atalatyn saıtynan atam – Abdrahman Ospanovqa arnalǵan «Marapat qaǵazy» degen maqalany oqydym. Onda atamnyń «Qyzyl Juldyz» ordenine usynylǵany týraly anyq ta naqty jazylypty.
«Ospanov joldas 1945 jyldyń 16 sáýirinde Brandenbýrg provınsııasynyń Gros-Noendor aýdanyndaǵy dushpannyń myqty kúsheıtilgen qorǵanysyn buzyp ótýde 3-shi Ekpindi armııanyń 79-shy atqyshtar korpýsyna qarasty 150-shi atqyshtar dıvızııasynyń 674-shi atqyshtar polki quramyndaǵy 1-shi batalonǵa úlken qoldaý kórsetti. Bul urys qımyldary Berlınge jaqyn tustarda da jalǵasyn tapty. A.Ospanov qarsha jaýǵan oqqa qaramastan, jaýdyń bir pýlemetshisin jer jastandyryp, eki pýlemetiniń únin óshirdi. Buǵan qosa, jaýdyń eki jaıaý ásker vzvodynyń kúl-talqanyn shyǵaryp, óziniń qoldaý kórsetýindegi bólimshelerdiń Berlınge shabýyldaryn tabysty jalǵastyrýlaryn qamtamasyz etti».
Marapatqa usyný qaǵazyn 276-shy Lenın ordendi Qyzyl týly jeńil artıllerııa gvardııalyq polkiniń komandıri polkovnık Medvedev toltyrypty. Osy jerde meniń oıyma atamnyń taǵy bir «Qyzyl Juldyz» ordeni bar ekeni oraldy. Sondaı-aq, omyraýynda «Germanııany jeńgeni úshin», «Berlındi alǵany úshin», «Varshavany azat etkeni úshin», «Kenıgsbergti azat etkeni úshin» medaldary jarqyraıtyn.
Búgingi kúni atamnyń surapyl soǵysta qandaı aýyrtpalyqtardy basynan ótkergenin kóz aldyma elestetýimniń ózi qıyn. Esesine, beıbit Qazaqstanda ómir súrip jatyrmyz. Atama jáne basqa da Uly Otan soǵysynyń ardagerlerine búgingi ashyq aspanymyz úshin zor rızashylyǵymdy bildirsem deımin.
Qajymurat OSPANOV.
