Senat depýtaty Alısher Satvaldıevtiń aıtýynsha, Prezıdent Qasym-Jomart Toqaevtyń búgingi Joldaýy óziniń aýqymy men kótergen máseleleri boıynsha tarıhı bolyp qalady.
«Bir palataly parlament qurý týraly usynys – qoǵamda keńinen talqylanatyn bastama. Bul másele aldaǵy bir jyl ishinde halyq pen barlyq ınstıtýttar tarapynan jan-jaqty qaralady», dedi senator.
Ol Memleket basshysynyń jastarǵa arnaǵan sózin de erekshe atap ótti.
«Prezıdent zań ústemdigi men tártiptiń mańyzdylyǵyn atap ótip, jastarǵa úlken senim artty. Álimjettik pen orynsyz qaqtyǵystardan aýlaq bolyp, bolashaq úshin eńbek etý kerektigin aıtty. Jasandy ıntellektini engizý máselesi de jastarǵa tikeleı qatysty», dedi Satvaldıev.
Senatordyń aıtýynsha, Joldaýda kórsetilgen tapsyrmalardy júzege asyrý úshin Parlament bir jyl ishinde tıisti zańdardy qabyldaýǵa kirisedi.
