«Búgingi Joldaý – qoǵam suranysyna, eldegi túıtkildi máselelerdi sheshýge berilgen naqty jaýap. Ol Qazaqstannyń damýyna tyń serpin beretin, ekonomıkalyq órleýine jol ashatyn tyń oılarmen, jańa bastamalarmen erekshelendi. Prezıdent memleketimizdiń aldaǵy damýynyń baǵyt-baǵdaryn aıqyndap berdi. Bul Joldaý tutas halqymyzdyń rýhyn kóterdi», – dedi Erlan Qoshanov.
Onyń aıtýynsha, sońǵy jyldary aýqymdy saıası reformalar qolǵa alynyp, eldiń saıası kelbeti túbegeıli ózgerdi. Endigi kezekte negizgi basymdyq ekonomıkalyq damý men sıfrlyq transformasııaǵa berilip otyr.
«Prezıdent Joldaýynyń negizgi arqaýy – ekonomıkany sıfrlandyrý, jasandy ıntellektini engizý jáne jańa tehnologııalar arqyly halyqtyń turmys-tirshiligin jaqsartý. Tipti, sıfrlandyrý ulttyq ıdeıa deńgeıine kóterildi desek artyq emes. Memleket basshysy Qazaqstandy úsh jyl ishinde jappaı sıfrlyq elge aınaldyrý mindetin qoıdy. Osy maqsatta Jasandy ıntellekt jáne sıfrlyq damý mınıstrligi qurylyp, ony Vıse-premer deńgeıindegi maman basqaratyn bolady», – dedi Májilis tóraǵasy.
Sonymen qatar Erlan Qoshanov Prezıdent usynǵan zańnamalyq bastamalardyń ishinde jańa Sıfrlyq kodekstiń qabyldanýyn erekshe atap ótti. Onyń aıtýynsha, qujat jasandy ıntellekt pen platformalyq ekonomıkany qoldanýdyń negizgi baǵyttaryn aıqyndap, barlyq saladaǵy jańǵyrtý jumystaryna quqyqtyq negiz bolady.
Májilis tóraǵasy Joldaýda kóterilgen ınvestısııalyq saıasatty jetildirý, jańa óndiristerdi damytý, bankterdiń naqty sektordy qarjylandyrýdaǵy rólin kúsheıtý, turǵyn úı-kommýnaldyq sharýashylyǵyn jańǵyrtý, bıznesti artyq tekseristerden qorǵaý syndy basym baǵyttarǵa da toqtaldy.
«Prezıdent ınvestısııalyq saıasatty túbegeıli jańǵyrtyp, óńdeý salasyna kóbirek qarjy tartýdy tapsyrdy. Sonymen birge bankterdiń qarajatyn ekonomıkaǵa jumsaýdyń tıimdi tetikterin tabý qajettigin aıtty. Bul máseleler Májiliste qaralatyn jańa zańdarda eskeriletin bolady», – dedi ol.
Erlan Qoshanov Memleket basshysynyń bir palataly Parlament qurý bastamasyn da tarıhı qadam dep baǵalady.
«Prezıdent mundaı taǵdyrly máseleni asyǵys sheshpeı, búkil qoǵamda keńinen talqylap, 2027 jyly jalpyulttyq referendým arqyly qabyldaýdy usyndy. Bul – halyqtyń pikirin eskeretin, ashyq saıasattyń naqty kórinisi», – dedi Májilis tóraǵasy.
Onyń aıtýynsha, Joldaýda aıtylǵan árbir bastama halyqtyń ómir sapasyn arttyrýǵa, Qazaqstandy Ádiletti, Baqýatty, Qaýipsiz jáne Taza memleketke aınaldyrýǵa baǵyttalǵan.
«Joldaý – elimizdi uıystyratyn, halqymyzdy biriktiretin mańyzdy qujat. Májilis depýtattary Prezıdenttiń tapsyrmalaryn oryndaý úshin barlyq kúsh-jigerin salady», – dedi Erlan Qoshanov.
