Foto: Úkimettiń baspasóz qyzmeti
Premer-mınıstr Oljas Bektenovtyń pikirinshe, Prezıdent Joldaýy eldiń jedel ınnovasııalyq damý qarqynyn qamtamasyz etip, jańa serpin beredi.
«Memleket basshysynyń «Jasandy ıntellekt dáýirindegi Qazaqstan: ózekti máseleler jáne ony túbegeıli sıfrlyq ózgerister arqyly sheshý atty Joldaýy elimizdiń odan ári jedel ınnovasııalyq damýyna zor serpin beredi. Qazaqstannyń bolashaǵy – tehnologııalyq órleýmen baılanysty, sondyqtan Prezıdent úsh jyl ishinde Qazaqstandy jappaı sıfrlyq memleketke aınaldyrý týraly strategııalyq mindet qoıdy», – dedi Úkimet basshysy.
Onyń aıtýynsha, keń kólemde sıfrlandyrýdy engizý jáne jasandy ıntellekt múmkindikterin paıdalaný memlekettik basqarýdy jańa deńgeıge kóterip, zamanaýı tehnologııalyq júıeni qalyptastyrýǵa jol ashady.
«Prezıdent atap ótkendeı, memlekettik basqarý júıesindegi sıfrlyq tásil «onyń azamattar múddesine saı bolýyn qamtamasyz etip, ashyqtyǵy men tıimdiligin eselep arttyrady». Jappaı sıfrlandyrý ártaraptandyrýmen qatar, búkil otandyq ekonomıkany keshendi túrde jańǵyrtýǵa jáne Qazaqstandy jahandyq arenada básekege qabiletti el retinde damytýǵa yqpal etedi. Úkimet Joldaýda aıtylǵan mindetterdi jedel oryndaýǵa bar kúsh-jigerin jumyldyrady», dep qorytyndylady Premer-mınıstr.
