Foto: Ashyq derekkóz
Alǵash ret Prezıdent Joldaýyna qatysqan ustaz óz áserimen bólisti. Ol bul is-sharanyń kásibı bolashaǵyna tyń serpin bergenin atap ótti.
«Men úshin eń áserlisi — bilim salasy men jańa tehnologııalarǵa, onyń ishinde jasandy ıntellektke berilgen erekshe kóńil boldy. Prezıdent bul salanyń el ekonomıkasy úshin mańyzdy qozǵaýshy kúsh ekenin atap, jasandy ıntellektti oqý prosesine engizý qajettigin aıtty. Sonymen qatar, muǵalimderdiń de osy baǵytta biliktiligin arttyrýy kerek ekenin jetkizdi. Bul sózder meni jigerlendirdi, óıtkeni jasandy ıntellekt tek tehnıkalyq sala mamandaryna ǵana emes, biz – pedagogtar úshin de tıimdi qural bola alady», dedi Marat Tańsyqbaev.
Pedagogtyń pikirinshe, Joldaýda kóterilgen máseleler ásirese bilim berý sapasyn arttyrýǵa baǵyttalǵan. Jasandy ıntellekt arqyly oqý baǵdarlamalaryn jańǵyrtý, oqýshylar men stýdentterdiń qabiletin ashý joldaryn jetildirý – qazirgi zaman talabyna saı bastamalar.
Ol sonymen qatar oqý prosesin jekelep júrgizý múmkindikterine nazar aýdardy. «Jasandy ıntellekt ár oqýshynyń jeke qabiletin eskere otyryp bilim berý – muǵalimder úshin tıimdi qural ári úlken kómekshi», dedi Marat Tańsyqbaev.
«Prezıdenttiń búgingi Joldaýy barsha ustazdar úshin úlken motıvasııa boldy dep esepteımin. El bolashaǵy – bilimdi jastar men bilikti mamandardyń qolynda ekenin taǵy bir márte túsindim. Men de óz tarapymnan jasandy ıntellektti qoldana otyryp, oqytý ádisterimdi jańartýǵa bar kúshimdi salamyn», dep túıindedi ustaz.
Aıta keteıik, Memleket basshysy Joldaýda bilim jáne ǵylym salasyna erekshe basymdyq berip, jasandy ıntellekt pen jańa tehnologııalardy engizý arqyly zamanaýı ári sapaly bilim berý júıesin qalyptastyrý qajettigin atap ótti. Bul baǵyttaǵy naqty tapsyrmalar aldaǵy ýaqytta iske asyrylýy tıis.
