Foto: «Baıtaq» partııasynyń baspasóz qyzmeti
Prezıdent Joldaýynda saıası júıege engiziletin ózgeristermen qatar, «Taza Qazaqstan» ulttyq jobasy, sý resýrstaryn basqarý, ekologııalyq qaýipsizdik syndy taqyryptarǵa erekshe kóńil bólindi. Qasym-Jomart Toqaev sý tapshylyǵy máselesin sheshý – eldiń turaqty damýy men ulttyq qaýipsizdigi úshin asa mańyzdy ekenin atap ótip, sıfrlyq basqarý júıesin qurý, bilikti mamandar daıarlaý jáne sý dıplomatııasyn nyǵaıtý qajettigin alǵa tartty. Sonymen birge Aral teńizin qalpyna keltirý baǵytyndaǵy jetistikter men Kaspııdiń tartylýynyń ǵalamdyq qaýipke aınalǵany sóz boldy.
«Joldaý – el damýynyń naqty baǵyty. Biz sıfrlandyrýdy, ınvestısııa tartýdy jáne jasyl energetıkany qoldaımyz. Eń bastysy – ekologııa men sý resýrstaryn utymdy paıdalaný. Prezıdent usynǵan bir palataly parlament qurý bastamasy da demokratııalyq ózgeristerge jol ashady», dedi Partııa tóraǵasy Azamathan Ámirtaev.
Oleg Pak, partııa tóraǵasynyń orynbasary, parlamenttik reformanyń tek qurylymdyq ózgeristermen shektelmeı, depýtattardyń derbestigi men halyq aldyndaǵy jaýapkershiligin arttyrýǵa baǵyttalýy tıis ekenin aıtty.
Áıelder keńesiniń Astana qalalyq tóraıymy Roza Temirqulova qoǵamdaǵy turaqtylyq pen tatýlyqtyń mańyzyn atap ótti.
«Prezıdenttiń bul bastamasy — tarıhı sát. Árıne, qoǵamda túrli pikir bar. Biraq eń bastysy — eldegi turaqtylyq pen tatýlyqty saqtaý. Árbir sheshim balalarymyzdyń bolashaǵyna áser etedi. Sondyqtan biz áıelder qaýymy retinde osy máseleni ashyq ári sanaly túrde talqylap, qoǵamda kelisim men ózara qurmetti saqtaýǵa shaqyramyz. Prezıdenttiń halyqqa degen senimi — úlken jaýapkershilik. Bul senimdi aqtaýymyz qajet», dedi.
Partııa jobalarynyń jetekshisi Qýandyq Nurtaev ekologııalyq ıdeologııa tujyrymdamasy Joldaýdaǵy basym baǵyttarmen úndesetinin, bul partııaǵa jańa saıası múmkindikter beretinin jetkizdi.
«Memleket basshysy 2025 jylǵy 8 qyrkúıektegi Joldaýynda elimizdiń jańa saıası maýsymy bastaldy. Biz 2025 jylǵy 5 maýsymda partııanyń Jańa ekologııalyq ıdeologııa tujyrymdamasyn tanystyrǵan bolatynbyz. Tujyrymdamanyń birqatar tarmaqtary Prezıdent Joldaýynan joldaýymen úndesedi. «Bul partııamyzǵa ekologııalyq kún tártibin júzege asyryp, aldaǵy Parlament saılaýynda jeńiske jetýge naqty múmkindik beredi», dedi ol.
Sonymen qatar jıynǵa Zoom arqyly aımaqtyq fılıal ókilderi, máslıhat depýtattary men buqaralyq aqparat quraldarynyń jýrnalısteri qosyldy.
Qorytyndysynda «Baıtaq» jasyldar partııasy Prezıdent Joldaýyn tolyq qoldaıtynyn jáne Qazaqstannyń ekologııalyq turaqtylyǵy men jasyl damý jolyna belsendi úles qosatynyn málimdedi.
