Ronaldý «Realdan» ketetin boldy

ASTANA. 20 naýryz. Krıshtıaný Ronaldý osy jyldyń jazynda nemese 2016 jyly koroldik klýbtan ketetin boldy. «Realdyń» prezıdenti Florentıno Peres osy qadamdy durys dep sanaıdy. Sebebi, ol fýtbolshynyń kelisimsharty aıaqtalǵanǵa deıin klýbta qalǵanyn qalamaıdy. Bul týraly egemen.kz habarlady. «Qazirgi kelisimshart 2018 jylǵa deıin. Ol kezde fýtbolshy 34 jasta bolady. Soǵan qaramastan Ronaldýdyń transferlik baǵasy búginnen bastap túsýde. Onyń ústine, Krıshtıanýdyń múldem jazylmaıtyn jaraqattary bar. Bul aldaǵy ýaqytta onyń oıynyna keri áserin tıgizeri anyq», – dep, Peres myrza óziniń áreketin túsindirýge tyrysty. Sonymen qatar, keıingi kezderi Ronaldýdyń tártibi de jıi synǵa ushyrap júr. Keıbir jankúıerler klýb prezıdentiniń álgindeı sóz aıtýyna osy másele basty sebep boldy degendi alǵa tartady. Desek te, aıtylǵan sóz – atylǵan oq. Sondyqtan aldaǵy ýaqytta fýtbol álemindegi taǵy bir iri transferlik aýysymnyń kýási bolýymyz ábden múmkin. Jankúıerlerdiń aıtýynsha, Portýgalııa fýtbolshysy «Realǵa» deıin oınaǵan «Manchester Iýnaıted» komandasyna qaıta barýy ǵajap emes. Tipti MIý-dyń burynǵy bas jattyqtyrýshysy Aleks Fergıýsson osy másele boıynsha Ronaldýmen arnaıy kezdesken degen de áńgimeler aıtyla bastady. Krıshtıaný Ronaldý 1985 jyldyń 5 aqpanynda Portýgalııanyń Madeıra qalasynda dúnıege keldi. Lıssabonnyń «Sportınginde» tálim alǵan ol 2003-2009 jyldary «Manchester Iýnaıted» komandasynda oınady. Alty jyldyń ishinde aǵylshyn klýby úshin 196 oıyn ótikizip, 84 gol soqty. Al 2009 jyly Madrıdtiń «Realyna» aýysty. Sol kezde Florentıno Peres fýtbolshy úshin MIý-ǵa 93,4 mıllıon eýro tólegenin aıta keteıik. Bul sol kezdegi rekordtyq meje edi. Sodan beri fýtbolshy «Real» sapynda 189 oıyn ótkizip, 207 gol soqty. Elaman Qońyr. Derek: egemen.kz. Sýret: sportbox.az.