Iаdrolyq qarýdyń beıbit turǵyndarǵa qarsy jumsalǵanyna 70 jyl

ALMATY. 6 tamyz. Budan 70 jyl buryn – 1945 jyly 6 tamyz kúni Amerıka Qurama Shtattary tuńǵysh ret ıadrolyq qarý qoldanyp, Hırosıma (Japonııa) qalasyna atom bombasyn tastady. Al 9 tamyz kúni ekinshi bomba Nagasakı qalasyna tústi. Bul týraly VVS habarlady. Jergilikti ýaqyt boıynsha 01:45-te bortyna «Bóbek» ("Little Boy") dep atalatyn atom bombasyn tıegen polkovnık Pol Tıbbets mingen V-29 áskerı ushaǵy 6 saǵattan soń Hırosımanyń ústine ushyp keldi. Japon áýe kúshteri dabyl qaqqan, alaıda, ushaqtyń jalǵyz ekenin baıqaǵan soń, dabyl qaǵýdy toqtatqan. Atom bombasy 9 shaqyrym bıiktikten tastaldy, jerge 600 metr qalǵanda jaryldy. Arada 20 mınýt ótkende qalanyń Tokıomen aradaǵy barlyq baılanysy tolyqtaı úzildi. Japon áskeri bas shtabynyń barlaýshy ushqyshy Hırosıma ústindegi jalyndy 160 shaqyrym jerden baıqaǵan. Kodtyq ataýy «Semiz» ("Fat Man") dep atalatyn ekinshi bomba Nagasakı qalasyna 9 tamyz kúni tastaldy. Atom bombasy túsken núkteden radıýsy 1 shaqyrym jerdegi barlyq tiri jan bir mezette ómirmen qoshtasqan. Máıitter kúlge aınalǵan. Eki shaqyrymdaǵy aýmaq túgeldeı otqa oranǵan, al, 20 shaqyrym jerdegi úılerdiń terezesi shashylyp túsken. Bul tusta Hırosımada 245 myń, Nagasakıde 200 myń turǵyn bar bolatyn. Talǵat Súıinbaı. Derek: VVS. Sýret: AR.