Foto: IIM
Mınıstrlik qarý-jaraq pen oq-dárilerdi zańsyz aınalymnan shyǵarý jumystaryn júıeli túrde júrgizip keledi. Bul sharalar jedel-profılaktıkalyq is-sharalar aıasynda jalǵasady.
1 qyrkúıekten beri respýblıka kóleminde «Ýchaske» jedel aldyn alý is-sharasy ótip jatyr. Sonyń nátıjesinde zańsyz aınalymdaǵy ondaǵan qarý-jaraq pen júzdegen oq-dári tabylyp, jasyryn qoımalar áshkerelendi.
Sonymen qatar Qańtar oqıǵasy kezinde urlanǵan Kalashnıkov avtomaty, tapansha, eki oıyq myltyq jáne eki tegis uńǵyly qarýmen qosa, polısııanyń bronejıletteri men kaskalary tárkilendi. Budan bólek, azamattar óz erkimen 15 qarýdy tapsyrǵan.
IIM málimetinshe, bıyl 21 myńnan astam azamattyq qarý tekserildi. Nátıjesinde 400-den astam adam ákimshilik jaýapkershilikke tartyldy.
«5 qyrkúıekte Almaty oblysynda jergilikti turǵyndar ustaldy, olardan qańtar oqıǵasy kezinde Almaty qalasynda urlanǵan arnaıy myltyq tárkilendi. Bul baǵyttaǵy jumys jalǵasady», dedi IIM krımınaldyq polısııa departamenti basqarma bastyǵynyń orynbasary Jandos Batyrbekov.
