Bastapqy jospar boıynsha, 2025 jyly Araldaǵy sý kólemin 20,6 mıllıard tekshe metrge jetkizý kózdelgen bolatyn. Jalpy alǵanda, Soltústik Araldyń sý kólemin 2030 jylǵa deıin 27 mıllıard tekshe metrge deıin ulǵaıtý josparlanǵan edi.
«Sý resýrstaryn basqarý júıesin damytý tujyrymdamasynda kózdelgen Soltústik Araldyń sý kólemin arttyrý kórsetkishterine jospardan erte qol jetkizilip jatyr. Qazirgi nátıjelerge 2029 jyly jetý kózdelgen bolatyn», dedi Sý resýrstary jáne ırrıgasııa mınıstri Nurjan Nurjigitov.
Onyń aıtýynsha, Dúnıejúzilik bank granty aıasynda Soltústik Araldy saqtaý jobasynyń tehnıkalyq-ekonomıkalyq negizdemesi de ázirlenip jatyr. Atap aıtqanda, Kókaral bógetiniń bıiktigin 2 metrge kóterý jáne Aqshataý men Qamystybas kól júıelerindegi sýdyń deńgeıin turaqtandyrý úshin gıdrotorap salý múmkindigi qarastyrylyp jatyr.
«Joba Soltústik Araldaǵy sýdyń kólemi men sapasyn arttyrýǵa, Syrdarııa ózeniniń atyraýyn qalpyna keltirýge, teńiz túbinen tuzdyń shyǵýyn azaıtýǵa, Qyzylorda oblysyndaǵy balyq sharýashylyǵyn damytýǵa jáne jergilikti turǵyndardyń ómir súrý jaǵdaıyn jaqsartýǵa baǵyttalǵan», dedi mınıstr Nurjan Nurjigitov.
