Depýtattyń pikirinshe, partııalyq saılaý júıesine kóshý – ýaqyt talaby.
«Biz halyqaralyq qoǵamnyń bir bólshegi retinde álemde qalyptasqan jalpyǵa ortaq partııalyq saılaý júıesine birtindep kóshýimiz kerek. AQSh-ta eki partııalyq júıe ornyqqan, Eýroodaq elderiniń barlyǵy derlik partııalyq negizdegi Parlamenti men Úkimetin saılaıdy», dedi Ermurat Bápı.
Sondaı-aq ol halyqaralyq uıymdar tarapynan Qazaqstandaǵy saıası ózgeristerge qyzyǵýshylyqtyń artqanyn jetkizdi.
«Biz Azııa kontınentindegi qoǵamdyq-saıası damýy tereń stagnasııaǵa ushyraǵan memleketterdiń qorshaýyndaǵy elmiz. Avtorıtarlyq formadan attap ótýge bet alǵan bizdiń ózgeristerge ol memleketter úrke qaraıdy», dedi depýtat.
Buǵan qosa ol parlamenttik reformany halyqtyq talqylaýǵa salý – demokratııalyq qadam ekenin erekshe atap ótti.
«Endeshe, eki jylǵa jýyq aralyqta qoǵamdyq talqyǵa túsetin bul parlamenttik reformaǵa konstrýktıvti yjdahatpen belsene aralasýymyz kerek», dedi Ermurat Bápı.
