Foto: Ashyq derekkóz
Uıymdastyrýshylardyń málimetinshe, eldegi 15 áýejaıdan shamamen 15 myń qyzmetker narazylyqqa qosylýǵa nıetti. Olardyń qatarynda eń iri áýejaılar Inchhon men Kımpho da bar. Ereýildi Áýejaı qyzmetkerleriniń ulttyq alıansy qolǵa alyp otyr. Bul uıymǵa Inchhon áýejaıynyń aımaqtyq kásipodaǵy men ózge áýejaılardyń jumysshylar birlestigi kiredi.
Olar eńbek jaǵdaıyn jaqsartý jáne jumys kestesin ózgertýdi talap etedi. Qazirgi tańda Inchhon áýejaıynda «3 brıgada, 2 aýysym» júıesi qoldanylady. Qyzmetkerlerdiń aıtýynsha, mundaı tártip densaýlyqqa áser etedi. Kásipodaq «4 brıgada, 2 aýysym» júıesin engizýdi jáne enshiles qurylymdardaǵy qyzmetkerler úshin teń eńbek jaǵdaıyn qamtamasyz etýdi talap etip otyr.
«Bıylǵy Aı kúntizbesi boıynsha Jańa jyl kezinde ereýil bolmaǵannyń ózinde, áýejaılarda reıster 3-ten 8 saǵatqa deıin keshikti. Qazir qyzmetkerlerdiń 60 paıyzdan astamy aksııaǵa qatysatynyn rastady. Bul reısterdiń toqtaýyna da ákelýi múmkin», deıdi alıans ókilderiniń biri.
Soǵan qaramastan Inchhon áýejaıynyń ákimshiligi jolaýshylardy sabyrǵa shaqyryp otyr. Olar áýe qaýipsizdigine jaýapty negizgi qyzmetterdiń «ómirlik mańyzy bar» sanatqa kiretinin jáne olardyń jumysy toqtamaıtynyn eskertti.
«Ereýil bastalǵan kúnniń ózinde reısterdiń tolyqtaı toqtaýyna jol berilmeıdi. Ushýlardyń qaýipsizdigine jaýap beretin qyzmetterdiń jumysy qamtamasyz etiledi», dep málimdegen áýejaıdyń resmı ókili.
Degenmen sarapshylar saıahatshylarǵa saqtyq sharalaryn eskerýdi usynady. Koreıaǵa 19 qyrkúıekten bastap nemese Chhýsok merekesi kezinde jolǵa shyǵatyn týrıster avıakompanııalardan der kezinde aqparat alyp, qosymsha ýaqytty aldyn ala josparlaǵany jón.
