Depýtattyń aıtýynsha, Sorbulaq 37 jyldan beri Ile aýdany turǵyndarynyń basty problemasyna aınalǵan. Jaz aılarynda kólden taraıtyn jaǵymsyz ıis halyqtyń tynysyn taryltyp otyr.
Bıyl shilde aıynda júrgizilgen zerthanalyq tekserister Sorbulaq sýynda 31 túrli hımııalyq zattar men aýyr metaldardyń bar ekenin kórsetken. Ásirese kadmııdiń mólsheri qalypty normadan tórt ese kóp ekeni anyqtalǵan. «Bul – ókpe, búırek, júıke júıesin zaqymdap, onkologııalyq aýrý týǵyzýy múmkin asa qaýipti ý. Demek, Sorbulaq mańyndaǵy turǵyndardyń densaýlyǵyna naqty qaýip bar», – dedi depýtat.
Sonymen qatar, kóldegi káriz sýynyń kólemi 750 mln tekshe metrge jetken. Ekologtardyń boljamynsha, nóserli jaýyn nemese jer silkinisi jaǵdaıynda Sorbulaq arnasynan asyp, Aqshı men Kúrti aýyldaryn basyp qalýy múmkin. Mundaı jaǵdaıda las sý Ile, Balqash pen Qapshaǵaıǵa da taralý qaýpi bar. Depýtat 1988 jyly Jamanqum bógetiniń buzylýynan 13 adamnyń qaza tapqanyn eske saldy.
Halyq qalaýlysy Úkimetke tómendegideı usynystaryn jetkizdi:
-
Sorbulaq sýynyń quramyn, deńgeıin jáne qaýiptiligin tekseretin memlekettik komıssııa qurý;
-
Respýblıkalyq bıýdjetten qarjy bólip, zamanaýı káriz sýlaryn tazartý stansııalaryn salý;
-
Buǵan deıin bólingen qarajattyń maqsatty jumsalýyn anyqtaý úshin memlekettik aýdıt júrgizý;
-
Sýdy tıimdi paıdalaný úshin arnaıy joba daıyndap, ony aýyl sharýashylyǵyna baǵyttaý.
«Bul – tek Ile aýdanynyń emes, búkil Jetisý óńiriniń qaýipsizdigine qatysty másele. Sondyqtan Sorbulaq problemasyn Úkimettiń erekshe baqylaýyna alýdy suraımyn», – dedi Májilis depýtaty.
