Shyny kerek, bıyl jerlesterimizdiń irikteý týrnırinen esh irkilmeı ótetinine kúmánimiz joq edi. Biraq bári biz oılaǵandaı bolmady. Danııa, Albanııadan ozǵanymyzben, oıda-joqta Armenııaǵa jol berdik. Sonyń saldarynan Qap taýynyń qyrandary «Eýro-2026» dodasyna birden joldama aldy. Endi bizdiń jigitterge taǵy bir irikteý synynan ótýge týra keledi.
15–24 qyrkúıek aralyǵynda uıymdastyrylatyn pleı-off saıystarynda elimizdiń fýtzalshylary Italııaǵa qarsy oınaıdy. Bizden bólek, osy mejege Grýzııa, Belgııa, Bosnııa men Gersegovına, Rýmynııa, Slovakııa, Majarstan quramalary jetti. Sol kúnderi olar da qurlyqtyń basty dodasynyń joldamasyn sarapqa salady. Al óz toptarynda birinshi oryn alǵan Ýkraına, Belarýs, Polsha, Slovenııa, Horvatııa, Armenııa, Portýgalııa, Ispanııa, Chehııa, Fransııa alǵa qoıǵan josparlaryn kúni buryn oıdaǵydaı júzege asyryp, qazir «Eýro-2026» dodasyna esh alańsyz daıarlanyp jatyr.
Pleı-offta elimizge qarsylas atanǵan komanda jaıynda biz ne bilemiz? Italııa quramasy álem chempıonatyna jeti ret qatysyp, úsh ret oljaly boldy. 2004 jyly Apennın túbeginiń túlekteri fınalda ǵana ıspandyqtarǵa ese jiberdi (1:2). 2008, 2012 jyldardaǵy álemdik dodada qola medal ıelendi. Brazılııadaǵy jarystyń jartylaı fınalynda Ispanııaǵa (2:3) jol berip, úshinshi oryn úshin tartysta Reseıdi (2:1) jeńdi. Taılandtaǵy týrnırdiń sheshýshi tusynda taǵy sol Pıreneı túbeginiń tarlandarynan (1:4) utylyp, Kolýmbııany (3:0) qapy qaldyrdy.
Bizdiń jigitter de qara jaıaý emes. Jerlesterimiz áý basta Azııa chempıonatynda eki ret, keıinnen Eýropa birinshiliginde bir márte júldegerler qatarynan kórindi. 2021 jylǵy álemdik dodada tórtinshi orynǵa taban tiredi. Osy oraıda, ıtalııalyqtardyń 2018, 2022 jyldardaǵy «Eýronyń» toptyq týrnırlerinde súringenin de esten shyǵarmaıyq. Elimiz quramasy sol jarystardyń ekeýinde de pleı-offta baq synady. Slovenııada otandastarymyz tórtinshi oryn alsa, Nıderlandta shırek fınalǵa deıin jetti. Sonymen qatar ıtalııalyqtardyń keıingi eki álem chempıonatynan syrt qalǵanyn da aıta ketken jón. Elimiz sonyń ekeýine de qatysty. 2021 jyly Lıtvada tórtinshi satyǵa jaıǵassaq, 2024 jyly Tashkentte úzdik segiz komandanyń qataryna qosyldyq. Mine, osy jaǵdaıdyń barlyǵyn qaperge ala otyryp, fýtzalshylarymyzdyń ıtalııalyqtardy jarty jolǵa qaldyryp, qart qurlyqtyń basty dop dodasynyń joldamasyn ıelenýge kúsh-jigeri jetedi dep topshylaýǵa bolady.
