«О́ner» ortalyǵynda «Altyn sapa» syılyǵynyń ıegeri, «Altyn Orda» sán úıiniń negizin qalaýshy Yrza Tursynzada ulttyq ónerdi damytýdaǵy tájirıbesin bólisti.
«Kúnde ózgerip jatqan myna zamanda ulttyq salt-dástúrimizdi ǵana emes, qazaq áıeliniń bolmysyn saqtap kele jatqan qazaqtyń qolónershi qyz-kelinshekteri sanaýly ekenin basa aıtqym keledi. Aldaǵy ýaqytta osy kásipke bar ynta-jigerimen kirisetin qyz-kelinshekterimizdiń qatary kóbeıip, olardyń arasynan on saýsaǵynan óneri tamǵan, halyqaralyq deńgeıde moıyndalatyn ismerler shyǵady degen oıdamyn. Úsh kún ishinde qoldarynan shyqqan týyndylaryn kórmege qoıyp, Astanadan kelgen sheberlerden oqyp-úırenýge ynta tanytqan qyz-kelinshekterdiń qatarynda ónerge beıimi bar, talantty arýlardy baıqap qaldym. Olarǵa orta jolda toqtap qalmaı, sheberlikterin shyńdaı berse degen tilek aıtamyn. Jumyssyz júrgen qyz-kelinshekter osy kásipti úırensin degen nıetpen Astanadaǵy «Baqytty otbasy» ortalyǵynda tegin oqý kýrstaryn ashtyq. Birneshe jyl buryn bastalǵan ıgi bastama nátıjesin berip te jatyr. Olardyń ishinen óz baǵyttaryn tańdaǵan tamasha qolónershi sheberler shyqty», dedi Yrza Tursynzada.
«Sheberler sherýi» festıvalin uıymdastyrýdaǵy maqsat – jumyssyz qyz-kelinshekterge Astanadaǵy «Baqytty otbasy» ortalyǵynan kelgen mamandardyń dáristerin úırenýge múmkindik berý. Osy jerde bir-birlerińizben tájirıbe almastyńyzdar, aqyl-keńes berdińizder, tyń bastamalar aldyńyzdar. Jan-jaǵymyzda zamanaýı ulttyq qolónerimen álemge tanylyp jatqan elder qatary kóbeıip keledi. Sizder de boılaryńyzdaǵy qabiletti jetildirip, qolónerdi súıikti iske aınaldyrýǵa tyrysyńyzdar. Tabıǵı ónimderden tamasha órnek toqyp, kıim tigip, turmysqa qajetti san túrli buıym jasap, bardy uqsatqan ana-ájelerimizdiń kıeli ónerin jańa zamanǵa laıyqtap jalǵastyra berińizder», dedi oblys ákiminiń orynbasary Joldas Batyrhan.
Juqa kıizden jasalǵan sándi qalpaqtary, tizilgen monshaqtarmen kómkerilgen qol sómkeleri men órnekti kıiz gobelenderin kórmege ákelgen Shárbaný Dúısenqulova Yrǵyz aýdany, Aqshı aýylyndaǵy Myrzaǵalı Tólegenov atyndaǵy orta mektepte beıneleý páninen sabaq beredi. Tájirıbeli ustaz sabaqtan tys ýaqytta mekteptegi qolóner úıirmesine jetekshilik etedi.Oblystaǵy kórkem eńbek páni muǵalimderi qaýymdastyǵynyń múshesi. Oqýshylary 2015 jyldan beri ǵylymı jobalarǵa qatysyp júr. Gaýhar Túlkibaı, Nazken Sadyq sııaqty qolónerge qabiletti shákirtteri oblystyq, respýblıkalyq «Zerde» ortalyǵy, Kishi Ǵylym akademııanyń jobalarynan júldeli oryndar alyp kelgen.
«60h70 sm, 1h70 sm ólshemdegi kıiz gobelendi jasaýǵa shamamen 23 kún ýaqyt ketedi. Oǵan arnaıy tańdalǵan merınos qoıynyń júni jumsalady. Astyna jumsaq tósenish qoıyp, juqa etip jaıylǵan kıizdiń betine basy kertilgen arnaıy ınesimen túrli órnek salyp toqımyz. Kıiz toqý quraly 40-50 teńgeniń shamasynda. Ony Aqtóbeden satyp alyp ketemiz. Kórmelerden qalmaımyz. Sebebi ol jerde balalardyń eńbegi kózge túsedi. Mektepte qolónerge qatysqan oqýshylarym Albına Altaeva, Nuraı Qorqytqyzy jergilikti ýnıversıtette vızýaldy óner, dızaın mamandyǵyna oqýǵa tústi. Taǵy bir oqýshym Shuǵyla Shaıqaqova oblystyq ǵylymı jobadan úzdik shyǵyp, Q.Jubanov atyndaǵy óńirlik ýnıversıtettiń vızýaldy óner mamandyǵynyń oqý grantyn utyp aldy. Osy shara barysynda Eýrazııalyq dızaıner ortalyǵynyń múshesi, respýblıkalyq «Altyn sheberler» uıymynyń jetekshisi, terme baý toqýdyń sheberi Gúlmıra apaıdyń úsh kúndik sabaǵyna qatysyp, kıiz basý men terme baý tigý tájirıbesin úırendim. Kópten beri kıiz úıdiń sándi buıymy – terme baý toqýdy úırene almaı júr edim. Osyǵan qýanyshtymyn. Terme baýdyń quralyn satyp aldym. Endi oqýshylaryma úıretemin», deıdi Shárbaný Rafıkqyzy.
«Sheberler sherýi» megafestıvaliniń jeńimpazdary oblys ákiminiń Alǵyshattarymen marapattalyp, tigin mashınalary syılyqqa berildi. Kórmege qatysqan mektep oqýshylary da syılyqsyz qalǵan joq. Osy festıval aıasynda uıymdastyrylǵan «Ata kásibi – bala násibi» konkýrsynda Nazym Berikqyzy, Kámshat Nurdáýletqyzy, Ýálıhan Ulanuly úzdik shyǵyp, baǵaly syılyqtarmen marapattaldy.
Aqtóbe oblysy
