«Memleket basshysy sıfrlyq qalypqa kóshý arqyly ekonomıkanyń barlyq salalaryn jańǵyrtý mindetin qoıdy. Sondyqtan JI engizý naqty nátıjege baǵyttalýy tıis», dedi O.Bektenov.
Otyrys qorytyndysy boıynsha biryńǵaı ulttyq sıfrlyq júıeni qurýǵa baǵyttalǵan birqatar sheshim qabyldandy. Tıisti memlekettik organdarǵa naqty tapsyrmalar berildi. Osy jyldyń 15 qarashasyna deıin densaýlyq saqtaý salasynyń basym baǵyttaryna NQA-ǵa tıisti ózgerister engize otyryp, otandyq startaptardyń sheshimderin engizýdi qamtamasyz etý lázim. Sondaı-aq osy jyldyń 20 jeltoqsanyna deıin densaýlyq saqtaý salasyndaǵy 7 ártúrli aqparattyq júıeni «Qaztech» bazasyndaǵy ıntegrasııalanǵan 2 platformaǵa biriktirý kerek.
Sonymen qatar osy jyldyń 1 jeltoqsanynan bastap elektr jáne jylý jelilerin dıagnostıkalaý úshin jasandy ıntellekti tehnologııalaryn engizý qajet. Bularmen birge bıyl 20 jeltoqsanǵa deıin eldiń otyn-energetıkalyq kesheninde Aqparattyq qaýipsizdiktiń salalyq ortalyǵynyń jumysyn qamtamasyz etý tapsyryldy.
Aldaǵy ýaqytta densaýlyq saqtaý salasynda NQA-ǵa ózgerister engizý negizinde JI damıtyn bolady. Bul medısınalyq mekemelerge otandyq ınnovasııalyq jobalardy engizýge sebepshi bolady. Máselen, dárigerlerge arnalǵan JI-assıstent, onkologııalyq jáne taǵy da basqa aýrýlardy erte anyqtaý boıynsha fýnksıonal iske qosylmaq.
Osy jyldyń sońyna deıin 7 aqparattyq júıe 2-ge biriktiriledi. Osyndaı jumyspen salada jumys istep turǵan barlyq 30 AJ qamtylady. Osylaısha, birin-biri qaıtalaıtyn júıeler shoǵyrlandyrylady. Bul shara medısınalyq personaldyń jumysyn jeńildetip, júktemesin azaıtady.
Energetıka salasyna jasandy ıntellekti tehnologııalaryn engizý, elektr jáne jylý jelilerin dıagnostıkalaý úshin drondardy paıdalaný aqaýlardy dál anyqtaı otyryp, obektilerdi qysqa merzimde tolyq tekserýdi qamtamasyz etýge múmkindik beredi.
Qalalyq ınfraqurylymdy tekserý úshin qubyrlardyń boıymen qozǵalýǵa qajetti datchıktermen jabyqtalǵan arnaıy qurylǵylardy paıdalaný men ınfraqurylymnyń qazirgi jaǵdaıyn ishki jaǵynan tekserý josparlanyp jatyr. Bul sharalar monıtorıngke, ýaqtyly den qoıýǵa, aqaýlardyń biryńǵaı bazasyn jáne synı dárejelerge bólingen jóndeý josparlaryn qalyptastyrýǵa baǵyttalǵan. Jasandy ıntellektini engizý eńbek shyǵynyn azaıtady, energııamen turaqty jabdyqtaýǵa ári jylytý maýsymynyń oıdaǵydaı ótýine yqpal etedi.
Aqparattyq qaýipsizdiktiń salalyq ortalyǵyn qurý energetıkalyq júıeniń kıberqaýipsizdik salasyndaǵy sharalaryn kúsheıte túsedi. Ortalyq mamandary salanyń aqparattyq qaýipsizdigin qamtamasyz etý úshin onyń ereksheligin eskere otyryp, energetıkalyq obektilerge qoıylatyn jańa talaptardy ázirleıdi.
