Foto: ana tili
Oqý-aǵartý mınıstrliginiń habarlaýynsha, nátıjeler kórsetkendeı, jasóspirimderdiń quqyqtyq qorǵalýy joǵary deńgeıde qalyp otyr. Ortasha kórsetkish 90,3%-dy quraıdy. Bul balalardyń óz quqyqtaryn jaqsy biletinin ári olardy qorǵaýdyń qoljetimdi tetikterin paıdalana alatynyn aıǵaqtaıdy. Aımaqtar arasynda Qostanaı oblysy (94,5%), Mańǵystaý oblysy (93,5%) jáne Qyzylorda oblysy (93,1%) úzdik úshtikte.
«Mańyzdy kórsetkishterdiń biri – jasóspirimderdiń óz ómirine qanaǵattaný deńgeıi. Orta eseppen 10–18 jastaǵy balalardyń 85%-y óziniń áleýmettik jáne psıhologııalyq jaǵdaıyn oń baǵalaǵan. Bul baǵytta eń joǵary nátıje Qostanaı oblysynda (90,1%), Shymkent qalasynda (88,7%) jáne Qyzylorda oblysynda (88,5%) tirkeldi», delingen habarlamada.
Otbasyndaǵy senim de joǵary kórsetkishke ıe bolǵan. Balalardyń 90,4%-y ata-anasymen erkin sóılesip, oı-pikirin ashyq jetkize alatynyn aıtqan. Eń joǵary deńgeı Ulytaý oblysynda (97,5%), Astana qalasynda (95,3%) jáne Qostanaı oblysynda (94,7%) tirkelgen.
«Balalar ál-aýqaty ındeksi – balanyń densaýlyǵy, bilimi, otbasy jáne áleýmettik ortasyn qamtıtyn mańyzdy kórsetkish. Bizdiń maqsatymyz – eń aldymen balalardyń óz únin estý. Zertteý nátıjeleri olardyń ózderin qaýipsiz sezinetinin, ata-anasymen jaqsy qarym-qatynasyn jáne bolashaǵyna senimmen qaraıtynyn kórsetip otyr», dedi QR Oqý-aǵartý mınıstrligi Balalardyń quqyqtaryn qorǵaý komıtetiniń tóraıymy Nasymjan Ospanova.
2024 jyly Balalardyń ál-aýqaty ındeksi respýblıka boıynsha ósim kórsetip, ortasha máni 2,5 pýnktke artyp, 58,6 balǵa jetken.
