Saltanatty is-sharada Prezıdent kómekshisi – Baspasóz hatshysy Rýslan Jeldibaı Memleket basshysy Qasym-Jomart Toqaevtyń agenttik ujymyna arnalǵan quttyqtaý hatyn oqyp berdi.
«Ǵasyrdan astam tarıhy bar agenttik osy kezeńde elimizdiń aqparat salasyn damytýǵa ólsheýsiz úles qosty. Jurtshylyqty dúnıejúzindegi asa mańyzdy oqıǵalardan der kezinde habardar etip, Qazaqstannyń júzjyldyq jylnamasyn jazdy. Shejireli shańyraqta qoltańbasy qalǵan qalamgerler ult múddesin bárinen bıik qoıyp, halyqqa qaltqysyz qyzmet etti. Qazir de redaksııa ujymy bul ustanymnan aınymaı, aǵa býyn salǵan sara joldy laıyqty jalǵastyryp keledi. Olar qoǵamdaǵy kókeıkesti máselelerdi únemi batyl kóterip júr. Búginde agenttik birneshe tilde jańalyq taratatyn beldi halyqaralyq aqparat quralyna aınaldy. Álemdik basylymdardyń «Kazinform» málimetterine júginýi – sonyń aıqyn dáleli», delingen quttyqtaý mátininde.
Memleket basshysy Ádiletti Qazaqstandy qurý isine belsene atsalysyp, óz mindetin abyroımen atqaryp júrgen agenttik qyzmetkerlerine shynaıy rızashylyǵyn bildirgen. R.Jeldibaı birqatar qyzmetkerge Memleket basshysynyń Alǵyshatyn tabystady.
Sondaı-aq jıynda Premer-mınıstr Oljas Bektenovtiń, Senat tóraǵasy Máýlen Áshimbaevtyń, Májilis tóraǵasy Erlan Qoshanovtyń, Mádenıet jáne aqparat mınıstri Aıda Balaevanyń quttyqtaý hattary oqylyp, tapsyryldy.
Is-sharaǵa depýtattar, memlekettik qyzmetkerler, halyqaralyq uıymdar ókilderi, sarapshylar, BAQ ókilderi men «Qazaqparat»-tyń sheteldik áriptesteri qatysty.
«Biz birinshi kezekte uzaq jyl boıy jınaqtaǵan tájirıbemizben bóliskimiz keldi. Sondyqtan ótken tarıhpen birge, qazirgi jahandaný zamanynda agenttik nemen aınalysyp jatqany týraly jazdyq. Sondaı-aq vırýstyq kontent, tereń taldaý men ádil jýrnalıstik zertteý daıyndaý úshin qandaı tásilder qajet ekenin de qostyq», dedi «Qazaqparat» HAA dırektorynyń orynbasary Vladımır Kýrıatov.
Aıta ketsek, alǵashqy qazaq aqparat agenttigi 1920 jyly 13 tamyzda Búkilodaqtyq Ortalyq atqarý komıteti janynan ROSTA-nyń Orynbor-Torǵaı bólimshesi retinde ashyldy. Búginde «Qazaqparat» jańalyqtary qazaq, orys, aǵylshyn, qytaı, ózbek tilderinde taratylady.
