Foto: Astana qalasynyń ákimdigi
Qala ákimdiginiń aıtýynsha, atalǵan jumystar jol jabyndysynyń sapasyn arttyrýǵa, kólik keptelisin azaıtýǵa jáne qozǵalys jaǵdaıyn jaqsartýǵa múmkindik beredi.
«Búginge deıin uzyndyǵy 49 shaqyrym bolatyn 41 kóshede jumys aıaqtaldy. Máselen, Abylaı han dańǵyly A.Pýshkın kóshesinen Manas kóshesine deıin, Fahd ben Abdýl Azız kóshesi Baıseıitova kóshesinen Beısekova kóshesine deıin, Seıfýllın kóshesi Saryarqa dańǵylynan Respýblıka dańǵylyna deıin, Jumabaev kóshesi Momyshuly dańǵylynan Qoshqarbaev dańǵylyna deıin, Bókeı kóshesi Oqjetpes kóshesiniń sońyna deıin, Aqbıdaı kóshesi Q.Kemeńgeruly kóshesinen О́ndiris kóshesine deıin jáne taǵy basqa», dedi Jeńis Qasymbek.
Negizgi jobalardyń qatarynda:
- Sh.Beısekova kóshesi men N.Tilendıev dańǵyly qıylysyndaǵy kólik aıryǵy. Munda bıyl jol ótpesi men sezderdiń aralyqtary tolyq ornatylmaq.
- Buqar jyraý kóshesi (Joshy hannan Táýelsizdik dańǵylyna deıin) – joba aıasynda trotýarlar, jaryqtandyrý, baǵdarshamdar jáne ınjenerlik jeliler qamtylǵan. Asfalt tóselip, jaryq tirekteri qoıyldy, endi kabel tartý jáne turǵyn úı keshenderi mańyn abattandyrý jumystary júrgizilýde. Nysan jyl sońyna deıin tolyq iske qosylady.
- Qaısenov kóshesi (Uly Dala dańǵylynan Buqar jyraýǵa deıin) – ınjenerlik jeliler tartylyp, jıektastar men jaryq baǵanalary ornatyldy. Asfalttyń alǵashqy qabaty tóselgen, tolyq aıaqtalý qarasha aıyna belgilengen.
- Áıteke bı kóshesi (Q.Muhamedhanovtan Syǵanaqqa deıin) – qurylys pen abattandyrý jumystary júrip jatyr, qazan aıynyń sońyna deıin aıaqtaý josparlanǵan.
- Muhamedhanov kóshesi (Qorǵaljyn tasjolynan Aıtmatovqa deıin) – ótken jyly bastalǵan joba bıyl jol qozǵalysyn qamtamasyz etýdi kózdeıdi. Qazir asfalt tóseý júrgizilýde. 2025 jyly ınjenerlik jeliler tolyq ornatylyp, qozǵalys Qorǵaljyn tasjolyna deıin ashylady.
- T.Rysqulov kóshesi (Máńgilik Elden Nuraǵa deıin) – abattandyrý aıaqtalyp, velojolaq salyndy, asfalttyń ústińgi qabaty tóseldi. Baǵdarshamdar ornatylyp, jańa transformatorlyq qosalqy stansa salyndy. Jobanyń tolyq aıaqtalýy 2026 jylǵa josparlanǵan.
