Foto: UOK
Áıelder arasynda 48 kg salmaq dárejesinde Olımpıadanyń qola júldegeri Nazym Qyzaıbaı ýkraınalyq tájirıbeli boksshy Anna Ohotamen kezdesedi. 29 jastaǵy Ohota 2018 jylǵy álem chempıonatynyń fınalyna deıin jetip, áıgili úndilik Marı Komnan ǵana utylǵan bolatyn. Al 31 jastaǵy Nazym Qyzaıbaıdyń qorjynynda Olımpıada qola medalinen bólek, úsh dúrkin álem chempıony ataǵy bar.
Erlerdiń 50 kg salmaǵyndaǵy shırek fınalda Sanjar Tashkenbaı úndistandyq Mandengbam Sınghpen kúsh synasady. 22 jastaǵy qazaqstandyq boksshynyń óneri jankúıerlerdiń joǵary baǵasyn alyp júr. Bul kezdesýlerdiń jeńimpazdary álem chempıonatynyń medaline qol jetkizse, jeńilgender týrnırdi aıaqtaıdy.
Áıelder arasyndaǵy 60 kg salmaqta Vıktorııa Grafeeva brazılııalyq Rebekka de Lıma Santospen kezdesedi. Aıta ketsek, bıyl Astanada ótken Álem kýbogynyń fınalynda dál osy eki sportshy sharshy alańǵa shyǵyp, jeńis Vıktorııaǵa buıyrǵan.
Taǵy bir jartylaı fınaldyq aıqas 65 kg salmaqtaǵy Aıda Ábikevanyń qatysýymen ótedi. Ol aldyńǵy kezeńde Túrkııanyń Olımpıada chempıonyn aıqyn basymdyqpen jeńip, kópshilikti tańǵaldyrdy. Bul joly oǵan qarsylas bolatyn ırlandııalyq Greın Merı Ýolsh ta myqtylardyń biri sanalady.
Sonymen qatar áıelder arasynda 80 kg-nan joǵary salmaqta Eldana Tálipova polshalyq Agata Kasmarskamen kúsh synasady. Al erler arasynda 90 kg-nan joǵary salmaqta Aıbek Oralbaıdyń qarsylasy – eki dúrkin Olımpıada chempıony, kýbalyq Hýlıo Sezar la Krýs.
Aıta keteıik, jartylaı fınalda jeńilgender qola medalǵa ıe bolady, al jeńimpazdar altyn úshin fınalǵa joldama alady.
Jekpe-jekterdiń kúndizgi sessııasy astana ýaqytymen 16:00-de bastalsa, keshki sessııa 22:00-de ótedi.
