KTK telearnasynyń habarlaýynsha, Aqtóbede oqý-jattyǵý jıyndarynan keıin 15 jastaǵy mektep oqýshysy qaza tapty. Tragedııa aqpanda bolǵanymen, marqumnyń ata-anasy bul týraly tek qazir – Astanada osyǵan uqsas jaǵdaı bolǵannan keıin ǵana aıtyp otyr. Otbasy munyń bári uıymdastyrýshylardyń salǵyrttyǵynan boldy dep esepteıdi.
– Jıynǵa búkil oblystan 80 bala qatysty, biraq medısına qyzmetkerleri bolǵan joq. Ulym qulap qalǵan kezde, jattyqtyrýshy ony turǵyzǵan da, qaıta jibergen. Raqymjan edenge qulap, qozǵala almaı qalǵan. Jedel járdemdi kesh shaqyrdy. Al oǵan deıin es-tússiz jatqan balany syrtqa – qol-aıaǵynan ustap, jalańash denesimen alyp shyqqan, – deıdi jasóspirimniń ákesi Nurlybek Muqanǵalıev.
Oblystyq dene shynyqtyrý jáne sport basqarmasy aldaǵy ýaqytta mundaı jaǵdaıǵa jol bermeý úshin shara qabyldaý qajet ekenin moıyndady. Alaıda uıymdastyrýshylardyń kinásin joqqa shyǵarǵandaı boldy.
– Árıne, oqıǵa óte qaıǵyly. Biz budan sabaq alyp, mundaı jaıttyń qaıtalanbaýyna kúsh salýymyz kerek. Biraq, mysaly, Ereımentaýdaǵy jaǵdaıdy alaıyq: ol jerde de medısına qyzmetkeri tek alǵashqy qarapaıym kómek kórsetti. Sosyn báribir jedel járdem shaqyryldy. Qalaı bolǵanda da, kimniń kináli ekenin tergeý anyqtaıdy dep oılaımyn, – dedi Aqtóbe oblystyq sport basqarmasynyń basshysy Meırambek Mahambetov.
Alaıda tergeý isti sońyna deıin jetkizbedi. Qylmystyq is naýryz aıynyń sońynda, Raqymjan áli jansaqtaý bóliminde ómir úshin kúresip jatqan kezde jabylyp qalǵan. Ata-anasy isti qaıta qaraýdy talap etip otyr.
