Keshe Memleket basshysy Nursultan Nazarbaev Astanadaǵy Qoshqarbaev jáne Jumabaev kósheleriniń qıylysynda ornalasqan «Jeruıyq» saıabaǵyndaǵy general I.V.Panfılovtyń eskertkishin ashý rásimine qatysty.
Saltanatty rásim barysynda Elbasy barsha ardagerler men el turǵyndaryn Otan qorǵaýshy kúnimen jáne Uly Jeńistiń 70 jyldyq mereıtoıymen quttyqtady.
«Bul – Keńes Odaǵynyń Batyry Ivan Panfılovqa ǵana arnalǵan eskertkish emes, fashızmge qarsy kúreske qatysqan barlyq qazaqstandyqtarǵa, urys dalasynda qaza tapqandarǵa jáne aman-esen oralyp, eldi damytýǵa orasan eńbek sińirgen ardagerlerge degen taǵzym», – dedi Qazaqstan Prezıdenti.
Nursultan Nazarbaev general-maıor Panfılovtyń basshylyǵynda bolǵan 316-shy atqyshtar dıvızııasy Almaty oblysynda qurylǵanyn eske saldy.
«Osy dıvızııanyń 28 panfılovshy jaýyngeri Máskeý túbindegi eń surapyl shaıqasqa qatysty. Dıvızııa qatarynda Keńes Odaǵynyń Batyry Baýyrjan Momyshuly boldy. Olar fashısterdiń tanktermen jasaǵan shabýylyna birge toıtarys berdi. Sol sebepti de, general Panfılovtyń esimi Uly Otan soǵysy tarıhynda qaldy. Bizder, qazaqstandyqtar, olardy ózge batyrlarmen birge qaster tutyp, jadymyzda saqtaımyz», – dedi Memleket basshysy.
Qazaqstan Prezıdenti búgin bar syı-qurmet pen tilek soǵys ardagerlerine arnalatynyn atap ótti.
«Elimiz qajetti qoldaýy men járdemin kórsetýde. Árqaısyńyz memlekettiń qamqorlyǵyndasyzdar. Men árqaısyńyzdy da Jańa jylmen quttyqtaýǵa tyrystym. Biz ardagerlerdi merekelerde ǵana emes, barlyq ýaqytta ardaqtaıtyn bolamyz, óıtkeni, sizder buǵan laıyqsyzdar. Búgingi urpaqtyń turaqty, táýelsiz ári tatý Qazaqstandy qurýy – sizderdiń erlikterińizdiń óteýi. Elimiz qalaı órkendep kele jatqanyn kórip otyrsyzdar, sondyqtan bekerge soǵysyp, qan tókpegen ekenbiz dep oılaýlaryńyzǵa tolyq negiz bar. Aramyzda aman-saý júrip, jastardy patrıottyq pen Otanǵa adaldyq rýhynda tárbıeleı berińizder!» – dedi Nursultan Nazarbaev.
Keńes Odaǵynyń Batyry, general-maıor I.V.Panfılov eskertkishiniń avtory – músinshi Renat Ábenov. Bıiktigi 2,5 metrlik eskertkish qoladan quıylǵan. Onyń orta tusynda gúl shoqtaryn qoıatyn arnaýly taqta bar.
Monýmenttiń shyǵys jaǵynda alleıa boıymen Máskeýdi qorǵaý kezinde sheıit bolǵan 28 panfılovshy-jaýyngerdiń týǵan jyldary men qaza tapqan kúnderi jazylǵan, tabıǵı granıtten jasalǵan tabaqsha-plıtalar qoıylypty. Bul jerden Keńes Odaǵy Batyrynyń «Altyn Juldyzy» medali bederlengen 28 stelany da kórýge bolady.
Aınalasy kógaldandyrylǵan jáne jasyl jelekpen kómkerilgen alleıaǵa sáýle shyǵaratyn 2 arnaıy qondyrǵy men 16 shamnan jaryq túsiriledi.
Láıla EDILQYZY,
«Egemen Qazaqstan».
Sýretterdi túsirgender
S.BONDARENKO, B.OTARBAEV.
