Qaýipsizdik pen yntymaqtastyqqa esik árqashan ashyq

Keshe Aqordada Qazaqstan Respýblıkasynyń Memlekettik hatshysy Gúlshara Ábdiqalyqova Eýropadaǵy qaýipsizdik jáne yntymaqtastyq uıymynyń (EQYU) Astanadaǵy baǵdarlamasy ofısiniń jetekshisi N.Zarýdnamen kezdesti. Memlekettik hatshy Qazaqstan men EQYU arasyndaǵy ynty­maq­tastyq joǵary deńgeıde ekenin, oǵan elimizdiń 2010 jyly atalǵan uıymǵa tóraǵalyq etýi dálel bolatynyn atap ótti. Aldymyzdaǵy jyldarda Qa­zaqstannyń EQYU-men ara­daǵy yntymaqtastyq baǵyt­tarynyń biri «Qaýipsizdik qoǵam­dastyǵy jolynda» dep atalatyn Astana deklarasııasynda bel­gilengen Eýroatlantıkalyq jáne eýrazııalyq qaýipsizdik qoǵam­dastyǵyn qurý jónindegi strategııalyq maqsatqa qol jetkizý bolyp tabylady. Sonymen qatar, taraptar áleýmettik-gýmanıtarlyq damý­dyń, sot ústemdigin jáne adam qu­qyǵyn qamtamasyz etýdiń, etnosaralyq qarym-qatynasty úndestirýdiń, genderlik teńdikti qamtamasyz etýdiń birqatar máseleleri boıynsha ózara is-qımyldyń jaı-kúıi men keleshegin talqylady. G.Ábdiqalyqova Astanadaǵy EQYU baǵdarlamasynyń ofısi óz jumysynda Qazaqstannyń múddeleri eskerilgen ynty­maq­tastyqtyń basym salalaryna nazar aýdarýynyń mańyzdylyǵyna toqtaldy. Sonymen qatar, ol EQYU Turaqty keńesiniń 2014 jyl­dyń 18 jeltoqsanynda Vena qalasynda bolǵan otyrysynda 2015 jyldyń 1 qańtarynan bas­tap Astanadaǵy EQYU orta­lyǵyn endigi jerde EQYU baǵdar­lamasynyń ofısi dep atap, qaıta qurylǵandyǵyna baılanysty onyń jumys belsendiliginiń artatynyna nazar aýdardy. Kezdesý barysynda EQYU baǵ­darlamasynyń ofısi óziniń man­datyna sáıkes Qazaqstanda ortalyq jáne jergilikti memlekettik organdarmen jáne vedomstvolarmen ózara is-qımyldy qaýipsizdiktiń úsh ólsheminde (ás­kerı-saıası, ekonomıkalyq-eko­logııalyq, gý­manıtarlyq) jú­zege asyratyny aıtyldy. Kezdesýden shyqqan soń N.Za­rýdna hanym jýrnalısterge shaǵyn suhbat berip, óziniń kelissózder qorytyndysyna kóńili tolǵanyn jetkizdi. Bizdiń kezdesýimiz Qazaqstannyń talqylanǵan máselelerdegi reıtıngin ósire túsetininen úmittimin. Sondaı-aq, áıelderdiń shaǵyn bızneske qatysý belsendiligin arttyrý máselesi, adam saýdasy jóninde de pikir alysyldy, dedi ol. Kezdesýge Qazaqstan jaǵynan Májilis depýtattary E.Tarasenko men N.Ábdirov qatysty. Jaqsybaı SAMRAT, «Egemen Qazaqstan». Sýretti túsirgen Erlan Omarov, «Egemen Qazaqstan».