Kórmege qoıylǵan jumystar Almaty men asqaq Alataý baýraıynyń tumsa tabıǵatyn kóz aldyńyzǵa ákeledi. Olardyń deni saıabaqtaǵy serýenderden týyndaǵan áserler negizinde dúnıege kelgen. Kún sáýlesi, japyraq sybdyry men tabıǵattyń tańǵajaıyp boıaýlarynan shabyt alǵan sýretshi bul kórmeni jaı ǵana kartınalar toptamasy emes, óz sezimderiniń kúndeligine aınaldyrǵan. Árbir kenep – belgili bir sáttiń kórinisi ispetti. О́zen ústin japqan tańǵy tuman, batyp bara jatqan kúnnen tógilgen altyn shapaq, shóp arasyndaǵy kóleńkeniń oıyny tynymsyz plenerlerdiń jemisi.
«Sýretshiniń «ımpressıonızm» baǵytyna degen qushtarlyǵy aıqyn kórinedi. Tabıǵattan alǵan shabyty arqyly ol týyndylarynda erkindikke umtylady. Bul kórme – sýretshiniń sheberhanasynda, shyǵarmashylyq saparlar aıasynda jasaǵan úzdiksiz eńbeginiń nátıjesi. Ol plenerlerdi erekshe jaqsy kóredi. Qorshaǵan ortanyń eshqandaı baılyqqa satyp ala almaıtyn kórkem sulýlyǵy avtordy tereń tolǵanysqa jetelep, tabıǵatpen úndesken áserli týyndylarǵa shabyttandyrǵan. Sezimtal jandy jazǵy taýlardaǵy serýender, qala kósheleri men qysqy beıneler eshqashan beıjaı qaldyrmaıdy. Osy áserler onyń týyndylarynda jańǵyryp, tipti gúlderdiń názik sulýlyǵyn beıneleıtin natıýrmorttarda da aıqyn seziledi», deıdi ónertanýshy Aısulý Úsentaeva.
Talǵamy bıik kórermendi serýen sıqyryna boılatyp, kúnniń jylýyn sezinýge, gúl jaınaǵan dalanyń hosh ıisine elitip, tabıǵat áýenin tyńdaýǵa shaqyrǵan Svetlana Kakotkına Almaty qalasynda dúnıege kelgen. Bilimi boıynsha – dızaıner, sáýletshi. Bastapqy kórkemdik bilimin «Klassıkalyq óner gımnazııasynda» alǵan. 2002 jyly Qazaq bas sáýlet-qurylys akademııasyn «Dızaın» mamandyǵy boıynsha támamdaǵan. Stýdenttik jyldarynan bastap túrli baıqaýlar men kórmelerge qatysyp, shyǵarmashylyq izdeniste kele jatqan sheber adam rýhyna kerek barlyq ıgilik tabıǵatta jatqanyn aıtady.
«Sýretshiniń qalamgerlerden aıyrmashylyǵy salǵan sýretin ózge tilderge aýdaryp áýrelenbeıdi. Sebebi ónerdiń tili tutas adamzatqa ortaq. Ony árkim óz óresinde túsinedi. Tabıǵat – tunyp turǵan sýret. Sol sýretti sezinip, kóńilińe kóshirip alý bólek te, kenepke túsirý múlde bólek. Boıaý garmonııasyn sezinbeseń bári beker», deıdi kórme avtory.
ALMATY
